في الفترة اللي فاتت سمعنا شركات كتيرة وقعت عقود استثمارا وتشييد مشروعات في المنطقة الاقتصادية لقناة السويس، واغلب الشركات والاستثمارات الأجنبية اللي وصلت مصر بتستهدف بدء مشروعها في المنطقة دي بالذات.. ياتري اية سر تركيز كل المشروعات الاستثمارية الجديدة في المنطقة الاقتصادية لقناة السويس.. خليكم معانا للآخر وهتعرفوا التفاصيل.
مشروعات كتيرة جدا الدولة وقعت علي مستثمرين اجانب علشان يدشنوا مشروعات ومصانع في مصر، والغريب أن اغلب الاستثمارات الاجنبية اللي وصلت لمصر كان هدفها الدخول للمنطقة الاقتصادية لقناة السويس، وفي الفترة اللي فاتت الدولة وقعت كم كبير من المشروعات في مجالات الطاقة الجديدة والمتجددة، والهيدورجين الأخضر والصناعات التكليمية واطارات السيارات وتصنيع العربيات وأنواع تانية كتيرة كلها هتبدأ تصنيع وتنتج عندها هنا في مصر وهيكون انتاجها لتغطية الاحتياج المحلي والتصدير للخارج.
طيب ليه كل التركيز علي المنطقة الاقتصادية لقناة السويس؟.
السبب الرئيسي في الطفرة الاستثمارية اللي هلت علي المنطقة الاقتصادية لقناة السويس كان البنية التحتية الرهيبة اللي قامت بيها الدولة المصرية في تطوير المواني الموجودة علي طول خط القناة واللي حاليا بقت بتضم 4 مناطق صناعية و6 موانئ بحرية على البحر المتوسط والبحر الأحمر.
التطوير اللي حصل في البنية التحتية للمواني الموجودة علي طول خط القناة عمل نوع من التكامل مع المناطق الصناعية واللوجستية، واللي قدمت دعم لسلاسل الإمداد وحركة التجارة والصناعة، وتحولت المنطقة الاقتصادية لقناة السويس لمركز لصناعات الوقود، والموقع الاستراتيجي وجاهزية الموانئ البحرية مكنت المنطقة هناك من تقديم خدمات تموين السفن بالوقود الأحفوري والوقود الأخضر.
البنية التحتية الكبيرة اللي حصلت في المنطقة حفزت كمان بشكل كبير المشروعات الاستثمارية االلي عايزة تدخل المنطقة، وحاليا وصلعدد القطاعاا اللي بدأت تصنع وتنتج هناك لـ 21 قطاع صناعي وخدمي بتضم صناعات كتيرة جدا زي صناعات الأغذية والأدوية وصناعات السيارات.
الحوافز اللي قدمتها الدولة لجذب الاستثمارات الجديدة بالمنطقة مقفتش علي تجهيز البنية التحتية بس، لا ده كمان ضمت حوافز مالية مباشرة وغير مباشرة واعفاءات خاصة بالسلع اللي بنصدرها.
طيب اية هيا ابرز الشركات اللي دخلت وهتدخل لتنفيذ مشروعات في المنطقة الاقتصادية لقناة السويس؟.
المنطقة الاقتصادية لقناة السويس في الكام سنة اللي فاتوا استقبلت كم كبير جدا من المشروعات من اغلب دول العالم وخصوصا الصين اللي لها اكثر من مشروع استثماري صناعي لانتاج منتجات مختلفة بيحتاجها السوق المحلي وهيكون منها نسبة كبيرة للتصدير.
الاسبوع اللي فات المنطقة الاقتصادية لقناة السويس استقبلت وفد من السفارة الامريكية واللي اكد علي رغبة عدد من الشركات الامريكية للدخول للمنطقة الاقتصادية وتدشين مشروعات استثمارية جديدة هناك، وده اللي رحب بيه مسئولي المنطقة، وفي الفترة اللي هيكون في لقاءات بين اعضاء المنطقة الاقتصادية لقناة السويس والشركات الأمريكية بتسيق مع السفارة الامريكية بالقاهرة خصوصا الشركات اللي شغالة في مجال الرعاية الصحية والأجهزة الطبية.
0 تعليق