يا ترى ايه اللى هيحصل فى مصر بعد قرار الفيدرالى الامريكي بوقف جنون اسعار الفايدة؟وايه تأثير القرار على سوق الدهب وباقي المعدن ؟ وهل سعر الدولار فى مصر ممكن يتأثر بخفض الفايدة لأول مرة من فبراير 2022 ؟

امبارح ولأول مرة من أكتر من سنتين قررت لجنة السوق المفتوحة بمجلس الاحتياطي الفيدرالي الأمريكي خفض أسعار الفايدة بمقدار 50 نقطة أساس في  قرار جه متوافق مع توقعات السوق.. وخفضت اللجنة  أسعار الفائدة عند نطاق يتراوح بين 4.75% و5%، بعد ما شهدت سلسلة اجتماعاته اللى فاتت تثبيت المعدلات عند أعلى مستوياتها في اخر  23 سنة

طب يا ترى الكلام ده معناه ايه ؟

بص يا سيدي تقدر تقول كده ان الفيدرالى الامريكي أخيرا قرر منح الأسواق العالمخية فرصة لالتقاط الأنفاس ووقف قطار جنون الفايدة المستمر من حوالى 3 سنين وبكده بينهى سنوات صعبها عاشتها البنوك المركزية حوالين العالم كله كان من نتايجها رفع اسعار الفايدة على مختلف العملات وفى كل البلاد تقريبا

يعنى سعر الفايدة الامريكي ده مهم اوى كده ؟

مهم يمكن أكتر مما تتخيل وتأثيره مش بيكون على المواطن ولا الاقتصاد الأمريكي بس وده لأن امريكا هى اكبر واقوى دولة فى العالم واى قرار ليها بيكون ليه تبعات على العالم كله وكلنا شفنا ازاى من اول ما بدا الفيدرالى سياسته التشددية كل البنوك المركزية فى العالم تفريبا خدت نفس المسار ورفعت الفايدة بنسب مرتفعة وفقا لظروف ووضع اقتصاد كل بلد

طب ايه تاثير قرار الفيدرالى بخفض الفايدة على مصر؟

القرار هيكون ليه تأثير قوي فى أكتر من ملف أهمهم ملف الدهب اللى متوقع اسعاره تزيد شوية الايام الجاية مع اتجاه المستثمرين فى العالم كله للاستثمار فى الدهب باعتباره ملاذ آمن وكمان بعد تراجع سعر الفايدة على الدولار وطبعا ارتفاع السعر العالمي هيكون ليه تأثيرقوي على سعر الدهب فى مصر وفى الساعات الاخيرة بدأت الاسعار تتحرك فعلا بمعدلات كبيرة وسعر الجرام حاليا داخل على 3500 جنيه

فيه كمان تاثير متوقع على سوق صرف الدولاروده لأن السوق المصري هيكون جاذب بقوة للأموال الساخنة بسبب ارتفاع العائد على أدوات الدين المصرية ومع دخول تدفقات دولاريةده هيزود المعروض من الدولار ومع زيادة العرض الطلب هيرتاج ومعاه هينخفض سعر العملة الأمريكية

كمان البنك المكركزيهيبدا خلال الفترة الجاية يفكر هو كمان فى تخفيف السياسة التشددية وممكن يخفض اسعار الفايدة وده هيكون مهملفتح مشروعات جديدة وتشغيل السيولة المجمدة فى القطاع المصرفي بسبب ارتفاع اسعار الفايدة  .. لأن كتير من العملاء مع رفع سعر الفايدة بيفضل انه يستثمر امواله فى الشهادات اللى كانت بتحقق عائد صعب يوصل ليه لو فتح مشروع