الدهب رايح على فين.. كلنا لنسأل نفسنا دلوقتي السؤال دا وخاصة الناس اللي اشترت دهب وخزنته أو الناس اللي لسه بتفكر تشتري دهب عشان تشيله للزمن أو عشان تستثمر فيه.. خليك معانا عشان تشوف المفاجأة والسوق العالمي رايح فين .

 
معروف إن الدهب استثمار آمن ومضمون ومهما حصل مش بيخسر بس في نفس الوقت لازم نعرف أنه استثمار طويل الأجل يعني لو عاوز تكسب يبقي تصبر من 3 الى 5 سنين قبل ما تفكر تبيع الدهب ودا لأن السوق بيتقلب كل شوية لكن على المدي الطويل الدهب بياخد اتجاه تصاعدي ومش بيخسر..

والدهب زي ما احنا عارفين ماشي عكس الدولار يعني لو الدولار شديد وقوي سعر الدهب بينزل والعكس صحيح عشان كده الدهب بيمشي عكسي بردو مع سعر الفايدة في البنوك يعني لو سعر الفائدة رفع الناس بتحط فلوسها في البنوك وتريح دماغها والعكس صحيح بردو وكمان الدهب سعره رايح جاي حسب الأوضاع السياسية في العالم يعني لو فيه توتر زي اللي حاصل في المنطقة العربية أو روسيا وأوكرانيا فالسعر بيرفع زي ما شفنا وازاي سعره وصل لمستويات قياسية..

طيب إيه الجديد في سوق الدهب؟
شوف ياسيدي في الساعات الأخيرة تراجعت رهانات صناديق التحوط على صعود الدهب إلى أدنى مستوى ليها من اكتر من 3 شهور بعد فوز دونالد ترمب في الانتخابات الرئاسية الأميركية.. طيب دا معناه ايه؟ .. معناه حضرتك أن الطلب  على المعدن الثمين هيقل باعتباره ملاذ آمن وبالتالي اسعاره هتنزل تاني..

وحسب بيانات حكومية أميركية صناديق التحوط وغيرها من المضاربين الكبار خفضوا صافي مراكزهم الشرائية 11% إلى  197 ألف عقد بحلول 12 نوفمبر الحالي، وهو أدنى مستوى خلال 14 أسبوع ونتيجة لدا انخفض المعدن الأصفر بحوالي 8% من ساعة تسجيله مستوى قياسي خلال 31 أكتوبر اللي فات مع تسارع الخساير بعد إعلان فوز ترمب الأسبوع اللي فات.

الرئيس التنفيذي لشركة الأكاديمية الاقتصادية في دبي علق على الأوضاع في سوق الدهب وقال إن المخاطر السياسية والاقتصادية كانت وراء صعود الدهب في الفترة اللي فاتت وإن الأسواق كانت خائفة من حدوث ركود اقتصادي لكن مع توافر قراءات قوية للمؤشرات الاقتصادية الأميركية، تلاشت المخاوف من حدوث ركود في أميركا وبخصوص  المخاوف من التوترات الجيوسياسية في منطقة الشرق الأوسط، فإن ترامب وعد بالعمل على إنهاء الحرب في المنطقة، وان اهتمامه هيكون أكبر بالاقتصاد الأميركي.

خبراء السوق شايفين إن السبب الرئيسي في تراجع الدهب هو قوة الدولار الأميركي بشكل كبير، ودا اللي خلي البنك الفيدرالي الأميركي أكثر تحفظا تجاه خفض الفائدة في الفترة الجاية ..
الخلاصة الدهب فيه اكتر من عامل بياثر في سعره واهم حاجة من العوامل دي هي الصراعات الجيوسياسية في العالم وغير كده هيفضل سوق الدهب في انتظار المفاجآت.