الفترة الحالية الحكومة معندهاش حاجة غير الاستثمار، وخفض الدين الخارجي وزيادة ايرادات الدولة من الدخل الدولاري.. ياتري الحكومة بتتحرك في الملف ده ازاي.. وامتي مصر هتوصل لصفر ديون خارجية.

من بداية الفترة الرئاسية للرئيس عبدالفتاح السيسي، واصدر توجيهاته للحكومة بضرورة تعظيم ايرادات الدولة وتشجيع الاستثمار وخفض الاستيراد، وخفض استهلاك العملات الأجنبية في عمليات الاستثمار وتشجيع الانتاج المحلي والاعتماد عليه كبديل للاستيراد وكمان رفع كفاءته علشان يكون في درجة المستورد، علشان نبدأ نصدر منه للخارج علشان نزور الفاتورة التصديرية لمصر واللي طبعا هتكون بالدولار.
طيب اية اللي بتعمله الحكومة في ملف الدين الخارجي ؟.
رئيس مجلس الوزراء الدكتور مصطفي مدبولي قال ان الحكومة جت لها تكليفات مباشرة من الرئيس عبدالفتاح السيسي رئيس الجمهورية بتنفيذ خطة متكاملة لضبط الإيرادات والنفقات وضمان استدامة المالية العامة وتفادي العجز المالي.
تكليفات الرئيس السيسي للحكومة بدأت تترجم علي طول علي ارض الواقع وفعلا رئيس مجلس الوزراء عمل اجتماع عاجل مع لجنة إدارة الدين الخارجي ، وتنظيم الاقتراض واللي بتضم حسن عبد الله محافظ البنك المركزي، ورانيا المشاط وزيرة التخطيط والتنمية الاقتصادية والتعاون الدولي، وأحمد كجوك وزير المالية، وحسن الخطيب وزير الاستثمار والتجارة الخارجية لمناقشة استراتيجية النزول بالمسار النزولي للدين الخارجي.

الدكتور مصطفي مدبولي اتكلم وقال أن اللجنة مستمرة في تحقيق مستهدفات استدامة المسار النزولي للدين الخارجي وده بعد النجاح الكبير اللي حققته الدولة المصرية في السنة اللي فاتت، والنزول بمستويات الدين من إجمالي الناتج المحلى.
وعلشان نفهم الموضوع، لازم نعرف أن اختصاصات لجنة الدين الخارجي وتنظيم الاقتراض شغلها الاساسي بيقوم علي إدارة ملف الدين الخارجي بشكل متكامل، ووضع حد أقصى للاقتراض الخارجي سنويا، والحد ده بيتحدد وفقا لمعايير الاستدامة المالية.

برنامج الحكومة لخفض الدين الخارجي واللي اعلنت علي مدار 3 سنين بيستهدف وضع حد أدنى للإيرادات الضريبية وحد أقصى لإجمالي دين قطاع الموازنة، وده بهدف خفض إجمالي دين قطاع الموازنة إلى أقل من 81%  من إجمالي الناتج المحلي خلال العام المالي 2026/2027.
خطة الحكومة بتستهدف كمان تحقيق فائض أولي بنسبة 3.3 % من الناتج المحلي الإجمالي لعام 2026/2027، وكمان الحكومة قررت تعديل استراتيجية التمويل وإدارة الديون لخفض الديون واحتياجات التمويل الإجمالية وده هيحصل من خلال تحسين جودة التمويل المالي، وزيادة حصة مصادر تمويل الموازنة الخارجية وخفض حساب السحب على المكشوف للحكومة في البنك المركزي المصري تدريجيا .

طيب ازاي لجنة الدين الخارجي وتنظيم الاقتراض بتنظم الحصول علي القرض وعلي اي اساس مصر بتتقدم للحصول علي قروض؟
الدكتورة رانيا المشاط وزير التخطيط والتنمية الاقتصادية والتعاون الدولي قالت أن الحكومة شغالة بكل قوة علي تحقيق مستهدفات خفض مستويات الدين من الناتج المحلى الإجمالي وده هيكون بالتوازي مع العمل على ضخ استثمارات جديدة تضمن زيادة معدل النمو الاقتصادي وتنفيذ سياسات مالية بتهدف إلى زيادة الإنتاج المحلي وتخفيض الأعباء المالية، وتعزيز الثقة في الاقتصاد المصري على المدى البعيد.
وعلشان نوصل لخفض الاعباء المالية، الحكومة حاليا شغالة علي تحسين المؤشرات الاقتصادية واللي هتنعكس بشكل ايجابي على جذب استثمارات أجنبية ومحلية، والاستقرار المالي والتحسن الملحوظ في الأداء الاقتصادي هيوصل إشارات إيجابية للمستثمرين، وده هيعزز مناخ الاستثمار وهيحفز ضخ استثمارات في كل القطاعات، والتوجه ده خلي في حمل علي الحكومة لتوفير بيئة استثمارية مشجعة وآمنة ووقف الاقتراض وبدء رحلة النزول بالدين لمستوى صفر وهو هدف سهل نوصله بالتخطيط والخطط الزمنية زي ما قدرت دول تحقق صفر ديون.