الحج واحد من اركان الاسلام اللي الناس كلها بتتمني تعملها، ونفسها ربنا يكتبها لهم علشان يزورو بيت الله الحرام ويقفوا علي جبل عرفات، ويرموا الجمرات.. بس ياتري الاسعار السنة دي هتوصل لكام.. واية اقل واعلي سعر للحج السنة دي.. خليكم معانا للآخر وهتعرفوا التفاصيل

الحج واحدة من المناسك اللي كان الناس بتنستناها من السنة للتانية، حتي اللي عمل المناسك قبل كده، لما يرجع بيرجع بجسمه بس روحه بتكون متعلقة بمكة وزيارة الكعبة المشرفة، وبيفضل طول عمره فاكر كل حاجة وكل حركة عملها هناك، ونفسه الدنيا ترجع بيه تاني علشان يرجع يزور ويقف علي جبل عرفات.

طيب اية اللي حصل في موسم الحج للسنة دي؟.
موسم الحج السنة دي زيه زي كل سنة هتنظمه 3 جهات في مصر هي وزارة الداخلية واللي بتنظم قرعة الداخلية والتضامن الاجتماعي اللي بتنظم برامج حج قرعة الجمعيات الأهلية واخيرا ودي المهمة هيا قرعة الحج السياحي واللي بتنظمها وزارة السياحة والآثار واللي بتاخذ أكتر من 50% من حصة تأشيرات الحج اللي بتاخذها مصر كلها، والسنة دي عدد التأشيرات اللي هتاخذها وزارة السياحة والآثار هتوصل لـ36 ألف تاشيرة.

من كام ساعة وزير السياحة والآثار شريف فتحي اعتمد الضوابط اللي بتنظم الحج السياحي للموسم الجديد 2025، وفعلا شركات السياحة بدأت النهاردة تلقي طلبات حجز الناس اللي عايزة تروح تعمل مناسك الحج مع شركات السياحة والحج هيفضل مستمر معانا لمدة 30 يوم وهتكون القرعة يوم 23 من شهر ديسمبر اللي جاي.

وزارة السياحة أعلنت كمان عن أسعار برامج الحج للموسم الجديدة، وهيوصل سعر البرنامج البري  مستوى «ج» واللى هيكون تسكين الحجاج بمكة بمناطق العزيزية والنزهة وفي الزاهر 225 ألف جنيه، وسعر البرنامج البرى مستوى «ب» واللي هتكون فيه فترة إقامة الحجاج بفنادق مكة بفنادق بمسافة لا تبعد عن الحرم المكي من 1250 مترا وحتى 2000 متر بـ245 ألف جنيه، والمستوي البرى مستوى  «أ» واللي هتكون فيه إقامة الحجاج وقت تواجدهم بفنادق مكة بفنادق بمسافة لا تبعد عن الحرم أكثر من 1250 مترا بـ260 ألف جنيه.
أما الحج الاقتصادي فالوزارة أعلنت عن اسعار البرامج الاقتصادية وهيوصل سعر البرنامج الاقتصادي مستوى «ج» واللى هتكون تسكين الحجاج بفنادق مكة بمناطق العزيزية وفي النزهة في الزاهر بسعر 250 ألف جنيه ، وسعر البرنامج الاقتصادي مستوى  «ب» واللى هتكون فيه فترة إقامة الحجاج بفنادق مكة بمسافة لا تبعد عن الحرم المكي من 1250 مترا وحتى 2000 متر بسعر275 ألف جنيه، والبرنامج الاقتصادى مستوى  «أ» واللى هتكون إقامة الحجاج في وقت تواجودهم بفنادق مكة بفنادق بمسافة لا تبعد عن الحرم أقل من 1250 مترا بـسعر 295 ألف جنيه.

اما عن عشاق التميز والرفاهية واللي بيسافروا علي برامج 5 نجوم فيوصل سعر البرنامج 5 نجوم مستوى  «أ»، صف أول مباشر على الحرم وحتى 250 متر من الحرم المكي بسعر 580 ألف جنيه بدون تذاكر الطيران، وبرنامج الحج 5 نجوم مستوى «ب» إقامة صف ثاني على الحرم المكي بمسافة 250 متر وحتى 1250 متر بسعر 520 ألف جنيه.