يا ترى إيه قصة الخط الرابع لمترو الأنفاق، وليه وزارة النقل قررت تنفذ الخط ده في آخر سنتين، وهيخدم أي مناطق وهينقل كام راكب في اليوم، وهل في مكاسب اقتصادية له.. هنقولك كل التفاصيل في الفيديو ده فتابعنا للآخر. 
 

في الأيام الأخيرة، وزارة النقل ممثلة في الهيئة القومية للأنفاق، أعلنت عن تقدم معدلات تنفيذ مشروع الخط الرابع للمترو، واللي معروف باسم مترو "الهرم - أكتوبر"، عشان يبقي الخط ده نقلة نوعية في مجال النقل المستدام في مصر.

والمشروع ده مقسم على كذا مرحلة، المرحلة الأولى منه، بتمتد من غرب الطريق الدائري على حدود مدينة 6 أكتوبر، بعدين هيمر بمحطة المتحف المصري الكبير، وبعد كده ميدان الرماية ثم شارع الهرم لحد محطة الجيزة، وهتل هيتقاطع مع الخط الثاني للمترو، يعدين هيمتد بعد كده عشان يتقاطع مع الخط الأول للمترو في محطة الملك الصالح، بعيدين يمتد حتى محطة الفسطاط، وبالتالي هيخدم كل المناطق اللي بيمر بيها.

وبيوصل طول المرحلة دي 19 كم، وهيكون في 17 محطة، منها  16 محطة نفقية، وهي: (الفسطاط– الملك الصالح– الروضة - ميدان الجيزة – الجيزة – المساحة – مدكور – الطالبية – المطبعة – العريش – المريوطية – الأهرامات – الرماية – المتحف المصري الكبير – النصر – حدائق الأهرام ) + ( 1 سطحية ) هي محطة ( حدائق الأشجار).

كمان، بيتم تنفيذ الأعمال المدنية للجزء الغربي، من محطة المساحة لحد محطة حدائق الأشجار بنسبة إنجاز أكثر من 40%.

وبالنسبة للأعمال المدنية للجزء الشرقي، فبيمتد من محطة المساحة لحد محطة الفسطاط، وحاليا بيتم تسليم المواقع للشركة المنفذة عشان تنفذ أعمال التحويلات المرورية فيها.

وفي الفترة الأخيرة، تم حفر الجزء النفقى من بير النزول عند محطة حدائق الأشجار لحد محطة الأهرامات بطول حوالي 5.4 كم ، بواسطة ماكينة الحفر النفقي الأولى، كمان بيتم حفر الجزء النفقي بين محطة الأهرامات لحد محطة المساحة بطول حوالي 4.5 كم، من خلال ماكينة الحفر النفقي الثانية.

ودلوقتي، وزارة النقل بتدرس تنفيذ امتداد للخط الرابع عشان يوصل لحد العاصمة الإدارية الجديدة بإستخدام إما مترو أو قطار كهربائي، طبقاً لدراسات الجدوى المالية والاقتصادية اللي بتعملها.

ولكن، نقدر نقول إن الخط الرابع للمترو هينقل حوالي 2 مليون راكب بشكل يومي بعد ما يتم انتهاء تنفيذه بشكل كامل.

وبخصوص المكاسب الاقتصادية من تنفيذ الخط الرابع للمترو، فهو هيضيف حوالي 2 مليون راكب لشبكة المترو وبالتالي إيرادات وزارة النقل هتكتر وهتتضاعف، ومش بس كده ده كمان المناطق اللي هيمر بيها هتتحول لمراكز لأنشطة تجارية وكمان هيوسع مساحة العمران على حدود محافظة الجيزة ومدينة 6 أكتوبر، وده كله بجانب أنه هيسهل حياة المواطنين اللي هتركبه كل يوم، لأنه وسيلة نقل سريعة وسهلة ونضيفة وكمان صديقة للبيئة.