إزاى البنك المركزي أعاد ثقة المصريين فى الخارج بالقطاع المصرفي؟ ايه الحوافز اللى قدمها للعاملين فى الخارج؟  والتحويلات وصلت لكام حاليا ومتوقع توصل لكام الفترة الجاية؟

من فترة قريبة كان في فجوة كبيرة بين سعر الدولار في السوق الرسمية والسوق الموازية.. وده خلّى ناس كتير تتردد تحوّل فلوسها عبر البنوك.. يعني تخيّل كنت بتحوّل دولار بـ30 جنيه رسمي وفي السوق السوداء بيتباع بـ60 جنيه.. مين هيوافق يخسر نص فلوسه؟ بس الوضع اتغير 180 درجة من مارس 2024.. لما الحكومة وقّعت اتفاق مع صندوق النقد الدولي وسابوا سعر الجنيه يتحدد حسب العرض والطلب.

البنك المركزي بدأ يشتغل بذكاء وأول حاجة عملها إنه قضى على الفجوة دي.. ودلوقتي سعر الدولار في البنوك بقى أكتر من 50 جنيه وناس كتير من اللي كانت بتحوّل فلوسها برا النظام الرسمي رجعت تاني للبنوك عشان ببساطة بقى فيه مصداقية وأمان والسوق الموازية اختفت تماما.

طب ايه الحوافز اللي قدمها البنك المركزي للعاملين فى الخارج؟

البنك المركزي مش بس رجّع الثقة.. ده كمان قدّم حاجات تخليك تحوّل فلوسك وأنت مطمن.. مثلاً، دلوقتي تقدر تحول فلوسك من أي حتة في العالم وتوصل لحسابك أو محفظتك الإلكترونية فوري عبر شبكة المدفوعات اللحظية.. يعني مش هتستنى يومين تلاتة زي زمان.. لا.. التحويل بقى زي الرسائل على الواتساب بتوصل في ثانية ومش بس كده، البنك عمل شراكات مع بنوك كبيرة زي مصرف الراجحي في السعودية عشان الخدمة تبقى متاحة 24/7 وده شجّع المصريين في الخليج مخصوص يرجعوا يحولوا فلوسهم عبر القطاع المصرفي والبنوك المصرية.

ونيجي للأرقام بقى.. عشان الأرقام هي اللي بتحكي الحقيقة.. تحويلات المصريين اللي شغالين برا قفزت في 2024 بنسبة 51% عن 2023. يعني وصلت 29.6 مليار دولار السنة اللي فاتت،. بعد ما كانت 19.5 مليار بس في نوفمبر 2024 لوحده، التحويلات سجلت 2.6 مليار دولار، بزيادة 65% عن نوفمبر 2023. ولو بصينا على أول 9 شهور من 2024، الرقم وصل 20.8 مليار دولار، بزيادة 42.6% عن نفس الفترة في 2023. دي قفزات مش هزار، ودي نتيجة إصلاحات مارس 2024 اللي غيّرت قواعد اللعبة.

طب والتوقعات بتقول ايه عن مستقبل تحيلات العاملين بالخارج؟

الخبراء بيتوقعوا إن التحويلات تكمل صعود في 2025 وممكن توصل لـ32 أو 33 مليار دولار بنهاية السنة الجاية خصوصاً مع استمرار الخدمات اللحظية واستقرار سعر الصرف.. يعني لو شغال برا وبتفكر تحول فلوسك، دلوقتي هو الوقت المناسب، عشان فلوسك هتوصل بسرعة وهتستثمرها بأمان.

في الآخر البنك المركزي مش بس رجّع الثقة..  ده كمان فتح الباب لكل مصري برا عشان يساهم في دعم اقتصاد بلده.. فلو عندك دولار أو يورو محتار تحولهم ولا لأ.. جرب الخدمة الجديدة وشوف الفرق بنفسك.