لو معاك بطاقة ائتمانية ممكن تشتري بيها حاجة من غير ما تدفع ولا مليم دلوقتي.. بس في نفس الوقت ممكن تكون سبب يخليك تتوه في ديونك؟ طب لو قولتلك إن في بطاقة تانية ممكن تساعدك تكسب نقاط وتاخد كاش باك.. لكن لو استخدمتها غلط هتخسر أكتر مما تكسب؟ أو لو قولتلك إن اختيار البطاقة الائتمانية المناسبة ممكن يفرق معاك في حياتك المالية بشكل يخليك يا إما تعيش مرتاح.. يا إما تترمي في دوامة مصاريف مالهاش أول من آخر؟.

يلا بينا نكتشف سوا أنواع البطاقات الائتمانية اللي البنوك بتقدمها في مصر.. وايه الفرق بينهم.. وازاي تختار اللي يناسبك فعلا. 

أول حاجة لازم نفهمها إن البطاقات الائتمانية مش كلها زي بعضها .. كل بطاقة ليها مميزاتها وشروطها وعيوبها كمان .. والبنوك في مصر زي البنك الأهلي وبنك مصر وCIB وغيرهم بيقدموا أنواع مختلفة من البطاقات .. يعني في بطاقات كلاسيك وبلاتينيوم وتيتانيوم وجولد وفيزا وماستركارد.

طب ايه بقى الفروقات دي؟

لو بصينا على البطاقة الكلاسيك مثلا .. دي بتبقى أبسط نوع وأقل تكلفة من حيث الرسوم السنوية .. مناسبة للناس اللي بتبدأ تستخدم بطاقات ائتمانية أو اللي مش بيصرفوا كتير .. لكن الحد الائتماني بتاعها بيبقى محدود .. يعني لو عايز تشتري حاجة غالية ممكن متكفكش .. أما البطاقة الجولد أو التيتانيوم فدي بتبقى في المستوى اللي بعده .. بتقدم حد ائتماني أعلى ومميزات زي خصومات في المطاعم أو السفر .. بس طبعا الرسوم السنوية بتاعتها بتبقى أغلى.

لو بقى عايزين نطلع للمستوى الأعلى .. هتلاقي البطاقة البلاتينيوم أو السيجنيتشر .. دي بتبقى للناس اللي بتصرف كتير وبيحبوا الرفاهية .. بتقدم كاش باك يعني فلوس ترجعلك على المشتريات .. ونقاط تتجمّع تاخد بيها هدايا أو تذاكر طيران .. وكمان خدمات زي دخول صالات المطارات مجانا .. لكن عشان تاخدها لازم دخلك الشهري يبقى عالي وتستحمل رسومها اللي ممكن توصل لألوف في السنة.
طب والفرق بين فيزا وماستركارد؟

بصراحة الاتنين قريبين من بعض .. لكن فيزا بتبقى أشهر في الاستخدام داخل مصر .. وماستركارد ممكن تلاقيها أقوى في العروض الدولية .. فلو بتسافر كتير يبقى ماستركارد ممكن تكون اختيارك.

نيجي لسؤال مهم ازاي تختار البطاقة المناسبة ليك؟

أول حاجة لازم تبص عليها هي عاداتك في الصرف .. يعني لو بتصرف كتير على السفر والمطاعم يبقى بطاقة بلاتينيوم أو جولد تناسبك .. لو بتشتري حاجات يومية وبس يبقى الكلاسيك كفاية .. تاني حاجة هي ميزانيتك .. لازم تشوف الرسوم السنوية والفوايد لو اتأخرت في السداد .. لأن البنوك في مصر بتحط فوايد تصل لـ 2.5% شهريا لو مدفعتش في الميعاد .. ودي ممكن تبقى كابوس لو محسبتهاش.

تالت حاجة بقى هي احتياجاتك .. لو بتحب تجمع نقاط وتستفيد من عروض يبقى ابحث عن بطاقة بتقدم كاش باك أو برامج مكافآت .. ولو عايز حاجة بسيطة من غير تعقيد يبقى اختار بطاقة حدّها قليل وملهاش مميزات كتير .. وآخر حاجة لازم تسأل البنك عن الشروط .. لأن في بنوك بتطلب حد أدنى للراتب يوصل لـ 5000 جنيه مثلا عشان تاخد بطاقة معينة.

وخليك دايما فاكر .. البطاقة الائتمانية ممكن تبقى صديقك المفضل لو عرفت تستخدمها صح .. أو تتحول لعدوك لو مسيطتش على نفسك .. فكر كويس واختار اللي يناسب حياتك وميزانيتك.