لسه بتدرس ومش عارف تحدد اتجاه مستقبلك ومش عارف اعمل ايه في سوق العمل اللي بتطور كل يوم.. 

زمان كان اي خريج جامعه أو معهد يتخرج ويستنى جواب القوى العاملة أو يشتغل اي شغلانة بصرف النظر عن تخصصه العلمي ودا كان ليه اسبابه وقتها مع الاقتصاد المقيد وفرص العمل الضعيفة والصعبة ولأن كمان نظام التعليم وقتها مدخلش عليه أي تطور من ناحية ربط التعليم بسوق العمل والنتيجة كانت معدلات بطالة عالية والشباب مش عارف يعمل ايه..

دلوقتي سوق العمل في العالم كله اتغير وبقي محتاج شباب وخريجين بمواصفات خاصة ودا لأن الاقتصاد التقليدي بينتهي ودلوقتي فيه تخصصات جديدة واقتصاديات ذكية محتاجة خريجين بمواصفات خاصة ودا اللي نبه عليه الرئيس السيسي في اكتر من مناسبة وطلب من الحكومة ربط التعليم بسوق العمل الحديث وتدريس المواد اللي نحتاجها الاقتصاد الذكي الجديد زي البرمجة والرقمنة والذكاء الاصطناعي والتطبيقات المختلفة وتخصصات التكنولوجيا الحديثة المتطورة عشان يقدروا يبنوا مستقبل واعد بيدخل مرتبات عالية جدا.

الدولة أطلقت اكتر من مبادرة لتأهيل الشباب المصري لسوق العمل منها مبادرة رواد الرقمنة والاتصالات وتكنولوجيا الذكاء الاصطناعي ودي التخصصات المطلوبة دلوقتي.. فلو عاوز وظيفة براتب عالي يبقي لازم تطور من مهاراتك لأن العصر الحالي مش بالشهادات بس لكن بالمهارات كمان..

طيب إزاي تطور من نفسك ؟
فيه اكتر من طريق أولها انك تلتحق بالمبادرات اللي بتطرحها الدولة لتنمية المهارات الجديدة او ممكن تشتغل على نفسك وتتعلم طرق الاقتصاد الحديث وتدرس أو تاخد كورسات مكثفة في البرمجة والرقمنة والذكاء الاصطناعي والتطبيقات وبعدها هتلاقي شغل كتير لان المؤهلات دي مطلوبة بقوة في سوق العمل دلوقتي والمؤهلات الجديدة كمان هتخليك تعمل مشروعك الخاص وتبقى رجل أعمال في سوق مفتوح عليه طلب كل ساعة.

كمان لازم تتعلم لغات أجنبية بجانب المهارات اللي قلنا عليها لأنها حاجة مهمة جدا هتمكنك من التواصل مع الشركات العالمية في مصر أو في الخارج وهنا مستقبلك ممكن يتغير 180 درجة وفيه شباب مصري كتير بسبب مهاراته الحديثة قدر ينطلق وينور بره ويمسك مناصب مهمة في الشركات العالمية دي.. أهم حاجة متقفش محلك سر ولازم تتحرك.