يا ترى الدهب رايح على فين الفترة الجاية؟ في ارتفاع ولا هينزل؟ وهل الوقت الحالي وقت مناسب لشراء الدهب كاستثمار؟ وإيه العوامل اللي ممكن تأثر على سعر الدهب في الفترة الحالية والفترة الجاية؟ وليه فيه توقعات بوصول سعر الأونصة لـ 2900 دولار فى بداية 2025؟

"يا ترى الدهب هيروح على فين؟ ده السؤال اللي بيطرحه كل الناس دلوقتي الناس العادية ورجال الأعمال والبنوك المركزية وتقريبا مفيش حد الا ومهتم يعرف المعدن النفيس أسعاره هتوصل لفين خصوصا بعد اشتعال الصراع فى منطقة الشرق الأوسط وتصاعد المواجهة بين إيران واسرائيل بعد التطورات الأخيرة وهجوم ايران بالصواريخ على تل ابيب.. ومعروف ان الدهب بينشط واسعاره بتتضاعف فى اوقات التوترات والحروب لأن المستثمرين بيعتبروه أهم ملاذ آمن

طب إيه اللى حصل بعد تصاعد المواجهات العسكرية بين ايران واسرائيل؟

بعد ساعات قليلة من اندلاع المواجهات رفع بنك جولدمان ساكس توقعاته لسعر الدهب من 2700 دولار للأوقية في أوائل 2025 إلى 2900 دولار للأونصة وقال ان الفترة الجاية هتشهد  انخفاضات أسرع في أسعار الفائدة قصيرة الأجل في الغرب والصين وعمليات شراء قوية للدهب من البنوك المركزية

وأوصى جولدمان ساكس بشراء الدهب لفترة طويلة بسبب الدعم التدريجي الناجم عن انخفاض أسعار الفائدة عالميا وارتفاع الطلب من البنوك المركزية والمكاسب اللي بيوفرها اللجوء إلى التحوط في الدهب في مواجهة المخاطر الجيوسياسية والمالية والركود".

بس إيه اللي خلى جولدمان ساكس يقول كده؟

فيه كذا حاجة.. أول حاجة التضخم اللي بيزيد في كل حتة في العالم..التضخم ده بياكل في قيمة الفلوس، فناس كتير بتلجأ للدهب كحماية لمدخراتها .. وتاني حاجة، الأوضاع السياسية والاقتصادية اللي مش مستقرة في كتير من الدول، فناس كتير بتشوف الدهب كملاذ آمن فلوسها وبتحط فلوسها فيه لغايةما تشوف الدنيا هتروح على فين

طب إيه رأي الخبراء فى كلام جولدمان ساكس؟

الخبراء بيقولوا إن كلام جولدمان ساكس معقول جداً، وده ممكن يكون فرصة كويسة للمصريين عشان يستثمروا في الدهب. بس في نفس الوقت بيحذروا من شراء الدهب من أي مكان، ويقولوا لازم نشتري من محلات دهب معروفة وموثوق فيها.

يعني إيه الكلام ده بالظبط؟

يعني لو معاك فلوس زيادة، ممكن تفكر تشتري بيها شوية دهب.. بس قبل ما تعمل كده، لازم تستشير ناس  وتفهم كويس كل حاجة عن سوق الدهب عشان متقعش في أي فخ.

وخد بالك فيه فرق كبير بين شراء الدهب كاستثمار وبين شراء الدهب كحلي وزينة لو عايز تستثمر في الدهب، اشتري سبايك دهب أو عملات دهبية.. أما لو عايز تشتري دهب كحلي وزينة، يبقى ده موضوع تاني خالص.

طب لو مش عايز تشتري دهب، فيه بدائل تانية؟

أيوه، فيه بدائل تانية كتير، زي صناديق الاستثمار في الدهب، أو أسهم شركات التعدين. بس لازم تعرف إن كل استثمار فيه مخاطرة، ومفيش ضمان إنك هتكسب على طول الخط.. بس في آخر 3 سنينمحدشاشترى دهب وندم  

طب إيه النصيحة اللي ممكن أقولها لك؟

نصيحتي ليك، لو بتفكر تستثمر في الدهب، ابدا بمبلغ صغير الأول، عشان تجرب وتشوف النتائج.. ومتنساش إن الاستثمار في الدهب على المدى الطويل بيكون أفضل من المدى القصير.

في النهاية، قرار الاستثمار في ادهب قرار شخصي، وكل واحد حر ياخد القرار اللي يناسبه. بس قبل ما تاخد أي قرار، لازم تكون فاهم كويس كل جوانب الموضوع.

يعني إيه الكلام ده بالظبط؟

يعني لازم تعرف إن الدهب مش حل سحري لكل مشاكلك، ولا هيضمن لك الثراء. بس هو ممكن يكون جزء من استثماراتك، ويساعدك على حماية فلوسك من التضخم والتغيرات الاقتصادية.. والدهب  زي أي سلعة تانية، سعره بيطلع وبينزل. فقبل ما تستثمر فيه، لازم تتابع الأسواق كويس، وتكون مستعد لأي تقلبات.