في ناس كتير مش عاجبها الفايدة اللي بتدفعها البنوك علي الفلوس وعايزين أرباح أكتر علي فلوسهم وفي مدة أقل،  الحل ده قدمته البنوك تحت اسم أذون الخزانة واللي بيعد أفضل خيار استثماري وبأعلي فايدة.. لو عايز تعرف كل حاجة عن النقطة دي اقرأ التقرير ده للآخر.

كل واحد فينا معاه قرشين شايلهم علي جنب للزمن، عايز يحقق منهم إفضل مكسب واحسن استثمار، وفي ناس منا برضوا مش عاجبها الفايدة اللي بتدفعها البنوك علي الفلوس اللي العملاء حاطينها عندها، وهنا البنوك طرحت حاجة جديدة علشان تحفز العملاء في الاستثمار في روؤس الأموال وهياخذوا أعلي فايدة في أقل عدد من السنوات.

طيب اية حكاية أذون الخزانة دي؟.
أذون الخزانة دي  أداة من أدوات الدين الحكومية قصيرة الأجل، بتقترض بموجبها وزارة المالية كل اللي بتحتاجه من السيولة اللازمة للإنفاق على الأجور والدعم والمزايا الاجتماعية وباقي بنود الموازنة العامة للدولة من خلال عطائين أسبوعيين، بيديرهم البنك المركزي المصري.

طيب اسعار الفايدة على أذون الخزانة المصرية بتوصل لكام، وأية الفرق بين أذون الخزانة والفايدة علي القروض؟.
البنك المركزي رفع أسعار الفايدة على أذون الخزانة المصرية أجل 9 شهور إلى 23.05% لأول مرة، وده عائد يقدر المواطن يحصل عليه بعد ما يقدم طلب استثمار في أذون الخزانة المصرية في اي بنك من البنوك وخصوصا البنك الأهلي المصري واللي بيعد واحد من أكبر بنوك القطاع المصرفي.

سعر الفايدة اللي بتقدمه البنوك علي أذون الخزانة بيكون أعلي من الفايدة اللي بتقدمها البنوك على الشهادات، وأذون الخزانة المصرية بيتميز بقِصر مدة الاستحقاق، وبتبدأ بـ3 شهور، 6 و9 شهور وأخره هيوصل لسنة، لكن متوسط مدة الشهادة الادخارية بيوصل لـ 3 سنين في أغلب الحالات .

البنوك بتصرف عائد الشهادات الادخارية بشكل شهري أو ربع سنوي أو نصف سنوي أو كل سنة، ونسبة قليلة قوي من البنوك بتضيف العائد بشكل يومي يومي، لكن العائد على أذون الخزانة المصرية بيكون مقدم وفي اليوم التالي للشراء، وفي حالة لو المواطن اشتري أذون خزانة لمدة سنة بقيمة 100 ألف جنيه هيحصل على ما يقارب 23 ألف جنيه في اليوم التالي لقبول البنك المركزي المصري عرض الشراء.

وعشان تبقى عارف البنك المركزي، حدد موعد آخر اجتماع لجنة السياسات النقدية، وهو الاجتماع التامن لبحث أسعار الفائدة، ومن المُقرر أن يُعقد في يوم 26 ديسمبر 2024 الجاري ومش متوقع يرفع اسعار الفايدة والمرجح التثبيت أو الخفض.