قرض الزواج 2025..يا ترى لو أنت ناوي تتجوز ومش معاك فلوس تكفي تكاليف الشبكة وتشطيب الشقة والفرح تعمل إيه. . وهل في بنوك ممكن تديك قرض بتسهيلات كتيرة، والقرض ده ممكن يوصل لكام وإيه هي شروطه، ونظام التسديد على كام سنة.. هنقولك كل التفاصيل في التقرير  ده فتابعنا للآخر.
 

في ظل الظروف الاقتصادية اللي بتواجه عدد كبير من الشباب المقبلين على الجواز، في عدد من البنوك المصرية بتيح ميزات تنافسية لعملائها، عشان تلبي احتياجاتهم المالية، خصوصا فئة المقبلين على الجواز.

عشان كده بنك ناصر بيقدملك قرض الجواز اللي ممكن يوصل ل25 ألف جنيه، هو مبلغ مش كبير أوي بس يسد خانة من خانات الجواز.

ولو عايز القرض، فمطلوب من حضرتك تقديم  بعض أوراق، زي صورة بطاقة الرقم القومي سارية، مفردات مرتب، ووصل غاز كهرباء أو مياه أو تليفون حديث، وبرنت تأمينات، وقسيمة زواج، وكمان مطلوب تعهد بتحويل المرتب، وضامن حكومي بنفس الأوراق للمتقدم بدون قسيمة جواز، وإن يكون عنوان البطاقة مطابق لعنوان وصل الكهرباء أو المياه أو التليفون، وبعد كلزده البنك بيتيح لك صرف 25 ألف جنيه على 40 شهر.

كمان، البنك الأهلى بيقدم لحضرتك قرض الزواج، واللي بيوصل ل 500 ألف جنيه، ولكن في شوية شروط، زي إن مايقلش  عمر المقترض عن 21 سنة، وما يزيديش عن 60 سنة عند تسديد آخر قسط، وإن تكون قيمة القرض تتراوح بين 5 آلاف جنيه إلى 500 ألف جنيه، وممكن توصل قيمة القرض مليون جنيه في حال تعهد المقترض بتحويل مكافأة نهاية الخدمة للبنك.

أما بنك القاهرة، فهو كمام بيقدم لحضرتك قرض الزواج لموظفي القطاعين العام أو الأعمال العام، وموظفي الحكومة والقطاع الخاص، والمهن الحرة، وبسعر فايدة ميسرة.

وبالنسبة لشروط الحصول على قرض الزواج من بنك القاهرة، فهي إنه يكون القرض بحد أقصى 500 ألف جنيه، ويشترط ألا يقل الحد الأدنى للشخص 21 سنة.

كمان، لازم تتراوح فترة تسديد قيمة القرض بين 6 أشهر، وممكن توصل ل 120 شهر.

أما الأوراق المطلوبة لقرض الزواج من بنك القاهرة، فهي بطاقة رقم قومي وصورة شخصية حديثة، وكمان صورة وصل المرافق ويشترط ألا يكون مر عليه أكثر من 3 أشهر.

رابع بنك هيقدملك قرض الجواز هو البنك التجاري الدوليCIB، واللي بيوصل ل 350 ألف جنيه، وفي فترة سداد القرض إلى 5 سنين.

ولكن يشترط إن سن حضرتك مايزيدش عن 60 سنة عند سداد آخر قسط، ومرتب حضرتك مايقلش عن 2600 جنيه شهريًّا

فلو حضرتك مستعجل على الجواز وعايز قرض، فاختار البنك اللي يناسبك واطلع على أقرب فرع له، وألف مبروك مقدما.