هو ايه اللي هيحصل يوم الاثنين الجاي وايه حكاية مليارات الجنيهات اللي البنوك بتحضرها للعملاء وياتري ممكن تستثمرها في ايه.

لو فاكرين في يوم 5 يناير اللي فات بنك مصر والأهلي المصري طرحوا شهادات ادخار بعائد مرتفع بيوصل 22.5% و27% ودا كان لمحاصرة التضخم في الأسواق والسلع ووسيلة لجذب السيولة من الأسواق للحد من ارتفاع الأسعار وطبعا بما أن الشهادة دي أجل سنة فخلاص باقي يومين ولا تلاتة وتبدأ البنوك ترجع لاصحاب الشهادات دي فلوسها وخاصة إن البنوك لسه محسمتش أمر تجديدها أو طرح بدائل ليها بعد قرار البنك المركزي المصري الأخير بتثبيت أسعار الفائدة والاتجاه لتخفيض سعر الفايدة في الاجتماعات الجاية في السنة الجديدة.

والمعلومات بتقول إن  البنوك بدأت بتفعيل باكورة الطلبات الأولى للعملاء لشراء الشهادة مع عودتها من الإجازة يوم الأحد وهو ما يعني أول استحقاق هيكون في اليوم التالي من تفعيلها بما يعني الاستحقاق هيكون الاثنين الجاي مع مرور عام على شرائها.

طيب ازاي تستثمر فلوسك اللي هتاخدها من البنوك تمن شهادتك ؟
فيه اكتر من بديل تقدر تستثمر فيه فلوسك اللي اشتريت بيها شهادات ادخار واسترديتها أولها انك ممكن تحطها في شهادات ادخار تانية في البنوك بس بأجل اطول والافضل هنا تحطها في شهادات بأجل 3 سنين واللي متوفرة في البنوك بأسعار فائدة تنافسية  بين 18% إلى 22% سنويا ولكن بعائد أقل من شهادة ال27% اللي مدتها خلصت وميزة الاستثمار في شهادات الادخار أنها ملاذ آمن  خاصة الموظفين وأصحاب المعاشات وربات المنزل اللي معندهمش وقت ولا تجارب أو مهارة في أنواع الاستثمارات التانية وغير كده فلوسهم مضمونة ومفيش عليها خوف وعارفين هيكسبوا كام من الشهادة لأن العائد ثابت ومعروف.

تاني استثمار ممكن تحط فيه فلوسك هو اءون الخزانة واللي بقت دلوقتي مقصد مهم للاستثمار بسبب العائد الكبير والسريع منها ودا بيعتبر استثمار في الفائدة على الجنيه ومن خلال البنوك بردو  والاستثمار في أذون الخزانة  من الملاذات الآمنة وثبات العائد المقدم عليها وميزة أذون الخزانة أن مدتها مش بتزيد عن سنة وبتتراوح بين 3 و6 و9 أشهر وسنة وسجل سعر العائد بعد خصم الضريبة بين 22% و24% وتزيد وتقل وفق العرض والطلب في العطاءات وأجل الأذون.. وعشان نبقي عارفين الأذون دي حاجة زي الشهادة كده بتشتريها من البنوك وبتاخد عليها عائد سريع وبتختلف عن شهادات الادخار أن مدتها قصيرة ومش بتزيد عن سنة.

النوع التالت من الاستثمار هو الدهب واللي بيعتبر نت أهم الملاذاات الآمنة  لاستثمار المدخرات بعد القفزات اللي شهدها على مدار آخر 3 سنين لكن الاستثمار في الدهب بيحتاج دراية ومتابعة السوق و تحديد توقيت الشراء والبيع لتحقيق أكبر مكسب منه  لكن الاستثمار في الدهب بيختلف عن الاستثمار في الشهادات وأذون الخزانة لانه استثمار طويل الأجل يعني اكتر من 3 سنين وفي نفس الوقت الاستثمار في الدهب بيكون في فائض السيولة يعني العميل هيشتري الدهب ويسيبه فترة كبيرة قبل ما يفكر يبيعه.

هاني ميلاد، رئيس شعبة الدهب نصح اللي عاوز يستثمر في الدهب انه يشتري دلوقتي بسبب استقرار السعر وتوقعات ارتفاع الأسعار في 2025 عالميا ومحليا.