انتقد الإعلامي إبراهيم سعيد، تصريحات إمام عاشور نجم النادي الأهلي بعد التتويج بالسوبر المصري، بشأن حديث أحد اللاعبين عنه في أحد اللقاءات.
وحقق النادي الأهلي بطولة السوبر المصري للمرة الـ15 في تاريخه والرابعة على التوالي، بعد فوزه ليلة الخميس على نادي الزمالك بركلات الترجيح 7-6 بعد أن انتهى الوقت الأصلي والإضافي .
وقال إبراهيم سعيد في تصريحات تليفزيونية عبر شاشة «النهار»: «إمام عاشور بقى مركز في التصريحات وفي نوعية لعيبة مبتعرفش تصرح، أو التلقائية بتاعتهم بتخليهم مش عارفين يوصلوا المعلومة وده شيء مش صح».
وأضاف: «اللاعب اللي تحدث عنه إمام عاشور معروف وربنا يفك ذنقته، مفروض أيًا كان اللاعب هو موقف وعدى واللي اتكلم اتكلم، وإمام قال إنه كان بيكملمني في دورات رمضان».
وأكمل: «تصريح إمام عاشور مش موفق ومش في وقته، ونصيحتي ليك سيبك من التصريحات شوية وحاول تركز في الملعب، وعايزين نشوفك وأنت متألق، وبطل ترد على الناس شوية وجمهور الزمالك، عشان بالطريقة دي مش هتخلص».
وزاد إبراهيم سعيد: «كفاية أنك تبارك للعيبة والجهاز الفني والإدارة وأمشي، لأنك لو معملتش كدة هتلاقي نفسك أخطأت وبتتأخر، ركز في الملعب ومتشغلش نفسك بالردود على الناس».
وواصل إبراهيم سعيد: «متحاولش تبرر انتمائك احنا عارفين أنك لاعب مهم ومميز، والجمهور بيحبك عشان أنت كويس جوه الملعب مش عشان التصريحات خالص، وصدقني لازم تخرج من الحته دي وركز في الملعب وتمرينك بس».
وتابع: «الميزة اللي كانت عند إمام عاشور دلوقتي بيفقدها، ركز في الملعب وابعد عن السوشيال ميديا واللقاءات، عشان أنت لسه مش خبرة في اللقاءات دي دلوقتي مع احترامي ليكي».
وأتم إبراهيم سعيد تصريحاته قائلًا: «إمام عاشور بقى مستعجل في الملعب وبيسدد من أي حته كأنه بيخلص من الكورة بيشوط وخلاص بمعنى أصح، والحاجات الصغيرة دي بتخليك تفقد الثقة في نفسك، زمان كان عنده رؤية قبل ما الكورة توصله دلوقتي فقد الحته دي».
0 تعليق