إيه اللي يخلي رئيس زي ترامب يعلن حالة الطوارئ في مجال الطاقة؟ وإيه تأثير القرار ده على السوق العالمي؟ والأهم مين الدول اللي هتدفع تمن الخطوة دي... وهل مصر ممكن تكون من الدول دي؟

خد بالك لما رئيس زي ترامب يعلن حالة الطوارئ في مجال الطاقة ده معناه إنه بياخد قرارات استثنائية بخصوص النفط والغاز والمعادن اللي أمريكا بتحتاجها والكلام ده ممكن يشمل زيادة إنتاج الطاقة بأي ثمن وتجاوز قوانين البيئة اللي بتحد من التلوث وفتح الباب لحفر آبار جديدة وبناء مصافي وحتى تشغيل محطات طاقة بأقصى طاقتها بغض النظر عن القوانين اللي كانت بتحكمها قبل كده.

وترامب مش أول رئيس يستخدم قوانين الطوارئ.. لكن أول مرة يتم الإعلان عن طوارئ وطنية شاملة للطاقة.. واللي بيزود الغموض هنا هو إلى أي مدى القرار ده هيتمدد؟

وفيه سؤال تاني مهم برضوا.. ترامب عايز يوصل لإيه؟

ترامب دايمًا بيتكلم عن "استعادة العظمة الأمريكية" وبالنسبة له مفتاح العظمة ده في الطاقة في خطابه الأخير قال: "أمريكا هتكون غنية تاني... والدهب السائل تحت رجلينا هو اللي هيعمل كده.

ورؤية ترامب واضحة.. أمريكا تبقى المصدر الأول للطاقة عالميًا وتقليل الاعتماد على أي واردات خصوصًا من الصين وروسيا وكمان ضغط سياسي واقتصادي على أوروبا وآسيا من خلال التحكم في سوق الطاقة.

"طب السوق العالمي... هيحصل فيه إيه؟"

قرار زي ده هيعمل اضطرابات كبيرة، أهمها ان زيادة إنتاج أمريكا للطاقة هتضغط على أسعار النفط والغاز عالميًا والدول اللي بتعتمد على تصدير الطاقة زي الخليج وروسيا هتتضرر بشدة.. ولو أمريكا بدأت تتجاوز القوانين البيئية ده ممكن يخلي دول تانية تاخد نفس الخطوة خصوصًا في حالات نقص الطاقة.

وترامب مش بس عايز يسيطر على النفط والغاز هو كمان عايز ينافس الصين في إنتاج المعادن النادرة اللي بتدخل في تصنيع البطاريات والطاقة المتجددة.. ده هيزود التوتر بين أمريكا والصين.

نيجي للدول  اللي هتتضرر.. زي ما قولنا ازلهم دول الخليج وروسيا.. لأن أي زيادة في إنتاج أمريكا للطاقة هتضغط على أسعار النفط.. وده هيقلل دخل الدول اللي اقتصادها بيعتمد على النفط بشكل أساسي.. ترامب ممكن كمان يستخدم إنتاج أمريكا للطاقة كورقة ضغط على الاتحاد الأوروبي خاصة إن أوروبا بتعاني من أزمة طاقة بعد الحرب الروسية الأوكرانية.

ولو أمريكا بدأت تزود إنتاج المعادن النادرة وتدخل منافسة مباشرة مع الصين، ده هيقلل الهيمنة الصينية في السوق ده وهيخلق صراع جديد بين القوتين.

طب إيه الهدف الحقيقي؟

بصراحة ترامب مش بيتكلم بس عن اقتصاد... هو بيتكلم عن سياسة إعلان الطوارئ في الطاقة هيزود فرص العمل في أمريكا.. وهيزود من النفوذ السياسي الأمريكي عالميًا.. هيخلي أمريكا تتحكم أكتر في اقتصاديات الدول اللي بتعتمد على استيراد الطاقة.

القرار ده هيزود حدة التوترات بين القوى العظمى.. أمريكا عايزة تتحكم في السوق.. الصين مش هتسكت، وأوروبا هتلاقي نفسها في النص.. أما بالنسبة لنا في الشرق الأوسط فأي ضغط على أسعار النفط هيأثر بشكل مباشر على اقتصاديات المنطقة.

في النهاية.. خطوة ترامب دي ممكن تكون بداية لعصر جديد من الصراعات الاقتصادية والسياسية حوالين "مين المتحكم الحقيقي في الطاقة العالمية؟.. والسؤال اللي هيفضل شاغل العالم.. إعلان الطوارئ ده بداية لحل أزمة ولا بداية لأزمة أكبر؟