ازاي مصر كسبت 10 مليار دولار في سنة واحدة وايه القرار اللي المركزي خده ورجع كفة الميزان تاني وضرب السوق السوداء للعملة وازاي تحويلات المصريين كانت طوق نجاة للاقتصاد المصري.
 
طبعا بعد أحداث روسيا وأوكرانيا في بدايات 2022 العالم كله اتغير زي ما احنا عارفين والاسعار العالمية ولعت وحصلت اضطرابات كبيرة وخطيرة في الأسواق الدولية وفي حركة التجارة وبعدها جت العقوبات على روسيا والاسعار زادت اكتر لأن روسيا من أكبر الدول اللي بتصدر أغذية وحبوب في العالم ومصر من اكتر الدول اللي تضررت من الأزمة الروسية لاعتمادها بشكل كبير جدا على الاستيراد من البلدين دول والنتيجة تكلفة زيادة وكبيرة في فرق الأسعار العالمية.

كمان مصر عانت من خروج الأموال الساخنة خلال مدة قصيرة في نفس التوقيت وحصلت هنا الفجوة الدولارية الخطيرة والمقصود بيها الفرق بين المعروض من الدولار وبين المطلوب ودي كانت فرصة كبيرة للسوق السوداء وتجار العملة أنهم يحققوا مكاسب خرافية من تجارة العملة وخاصة إن سعر الدولار في البنوك كان ثابت عند مستويات معينة.. 

ونشطت السوق الموازية بشكل كبير في السوق المحلي وكمان راحت للسوق الخارجي وبقت تلم دولارات المصريين بالخارج ولأن فرق السعر كان كبير جدا بين سعر البنوك وبين السوق السوداء الدولة خسرت كتير جدا في نزيف الدولار وخسرت معاها مليارات الدولارات من تحويلات المصريين بالخارج واللي بتعتبر مورد أساسي للعملة الصعبة للبلد.

في مارس اللي فات البنك المركزي اتحرك سريعا وأخد قرار تاريخي بتحرير سعر الصرف ورفع الوصاية على الجنيه المصري وخلا سعره متاح حسب العرض والطلب وكانت الضربة القاضية لتجار العملة وخاصة إن القرار طلع من غير ما يتسرب يعني التجار ملحقوش يتصرفوا وشفنا بعدها حركة التصحيح الكبيرة اللي حصلت في سوق الصرف وعودة الدولار للبنوك وشركات الصرافة المرخصة ووفاة السوق الموازية وبعدها بدأت الاستثمارات الضخمة ترجع للسوق المصري والبداية الحقيقة كانت صفقة رأس الحكمة.

كمان رجعت تحويلات المصريين لحالتها الطبيعية وبدأت تحقق أرقام قياسية من تاني وسجلت 29.6 مليار دولار في 2024 حسب بيانات المركزي الأخيرة وبكده يتقرب من أعلي مستوي تاريخي سجلته في العام المالي 2020-2021 بتحويلات وصلت 31.4 مليار دولار .. طبعا عودة التحويلات المالية للمستويات دي هيزيد من استقرار الدولار في مصر لأنها بتخلق زيادة في المعروض وفي قدرة الدولة على الوفاء بالتزاماتها المالية بالعملة الصعبة.

وحسب بيانات البنك المركزي ارتفعت حصيلة تحويلات المصريين العاملين في الخارج بنسبة 51.3% زيادة في 2024 لتصل إلى 29.6 مليار دولار،مقابل نحو 19.5 مليار دولار خلال عام 2023.

وعلى أساس شهري وصلت الحصيلة في ديسمبر الماضي إلى أعلى مستوى لها منذ تحرير سعر الصرف عند 3.2 مليار دولار، مقابل نحو 1.6 مليار دولار خلال شهر ديسمبر2023، وفق بيانات البنك المركزي المصري.

وبتعتبر التدفقات المالية في شهر ديسمبر الماضي غير مسبوقة في هذا الشهر من كل سنة وكمان ارتفعت حصيلة التحويلات خلاله بمعدل 24.5% مقارنة بالشهر السابق عليه نوفمبر2024 واللي شهد تحويلات من المصريين في الخارج بنحو 2.6 مليار دولار.

وبحسب بيانات البنك المركزي بلغت التحويلات خلال أول 5 أشهر من العام المالي 13.8مليار دولار بنمو 77% عن مستويات 7.8 مليار دولار في الفترة نفسها من العام الماضي.. وفي الوقت نفسه، سجلت التحويلات خلال أول 11 شهر من عام 2024 نحو 26.3 مليار دولار مقابل 17.9 مليار دولار في الفترة نفسها من 2023.