كشف البطل العالمي ممدوح السبيعي، الشهير بـ"بيج رامي"، عن رحلته الصعبة قبل أن يصبح بطلًا لكمال الأجسام، وذلك خلال ظهوره في برنامج "كلم ربنا" المذاع على الراديو 9090، تقديم الكاتب الصحفي أحمد الخطيب.
صياد وعامل تراحيل
وقال بيج رامي: "كنت بشتغل صيّاد في كفر الشيخ، ودى شغلانتي وأنا في الجامعة، بعدها اشتغلت عامل تراحيل بقعد ع الرصيف انتظر رزقي، بعد الجامعة سافرت الكويت على مهنة صيّاد، لكن أول ما وصلت حصلتلي مشكلة كبيرة وهي إن كفيلي رفض يشغّلني وقال في وشي: (شوفلك كفيل تاني.. مش عايزك.. وشكلك مش عاجبني)".
وأضاف: "يومها الدنيا اسوّدت في وشي، لأن ده معناه البهدلة في الغربة، لأني سبت بلدي علشان ألاقي لقمة عيش تسترني.. لما الكفيل طردني مبقتش عارف أعمل إيه، وقعدت 4 شهور بشتغل عامل تراحيل، بقعد على الطرق استني كل يوم حد ياخدني يشغلّني أي حاجة علشان أجيب أكلي وشربي، لدرجة إني كنت بنام في الشارع وشنطتي هي المخدة.. بعدها بشوية سكنت في أوضة مع 14 واحد عشان المصاريف، لغاية ما وصل قدر ربنا وحياتي اتغيرت فجأة!".
دخول الجيم ونقطة الانطلاق
وأوضح أنه وسط هذه المحنة، بدأ جبر الله يظهر، حيث أخذه أحد أصدقائه إلى الجيم لأول مرة، وهناك عرض عليه مجموعة من الشباب المصريين من الشرقية أن يعمل كحارس في الجيم، مقابل تعلم التدريب والمبيت في الجيم بدلًا من النوم في الشارع.
وتابع: "وافقت واشتغلت 16 ساعة يوميًا، لكن للأسف بعد أسبوعين الجيم ده قفل وصاحبه قرر يبيع الأجهزة والمُعدّات! اللي جه علشان يشتري الأجهزة كان واحد لبناني، شافني وقال لي: (متيجي تشتغل معايا في الجيم بتاعي؟)، قلت له ياريت. في الوقت ده كان عندي يقين كبير إن ربنا هيجبرني وهيعوضني، معرفش إزاي، بس مش هيسيبني".
وبيّن أنه عمل في هذا الجيم لمدة سنة كاملة بأجر، وكانت هذه أول خطوة حقيقية في حياته. ومع الوقت، تعلّم التدريب، حتى قرر أن يجرب حظه في كمال الأجسام، قائلًا: "في يوم بالليل قلت لنفسي ليه متلعبش كمال أجسام وتتمرن؟ يمكن يكون ده باب رزق وإن ربنا عمل معايا كل ده علشان يجبرني آخد المسار ده؟ بصوت عالي قلت (أنا هجرب أشارك في ماتش وأكون لاعب كمال أجسام).. وفعلا!".
وأشار إلى أنه علم بوجود بطولة محلية لكمال الأجسام في الكويت بعد خمسة أشهر، فقرر الاشتراك فيها رغم أنه لم يكن لديه أي خبرة سابقة، لكنه تدرب ليلًا ونهارًا طوال هذه الفترة، وكانت المفاجأة أنه حصل على المركز الأول في أول بطولة يشارك فيها.
بكاء النجاح
وأضاف بيج رامي بتأثر شديد: "يومها مشيت في الشوارع اللي كنت بنام فيها وبكيت ورفعت وشي للسما وكلّمت ربنا.. عنيا كانت بتمطّر دموع وببكي بحُرقة لأني كنت حاسس إني مش هتوفق في حياتي، لكن ربنا قال لي (أنا بطبطب عليك أهو)".
وأكد أن هذا اليوم غيّر كل شيء في حياته، مضيفًا: "فهمت الرسالة والحكمة.. أنا مكنتش سافرت الكويت علشان اشتغل صيّاد أو عامل تراحيل، لكن علشان الكفيل يطردني.. علشان أشتغل في جيم.. علشان أتعلم وأحترف كمال الأجسام.. علشان يخليني بطل أبطال العالم.. دي كانت تدابير ربنا وتخطيطه.. في الأول بتكون قاسية.. لكن في نهايتها أسعد من خيال خيالك!".
واختتم حديثه قائلًا: "بعد البطولة دي تحديدًا بدأت حكايتي، ورحت بطولة المحترفين في أمريكا لأول مرة في تاريخ مصر، ولفيت العالم، وفزت بكل البطولات، وبقيت: بيج رامي! أنا لغتي مع ربنا هي (الانكسار)، لما بروح له لازم أروح له مُنكسر، لأن علاقتي به قايمة على العطف.. هو دائمًا يعطف عليّ ويحنو عليّ، والانكسار بين إيدين ربنا (عِز).. وأنا بيني وبين ربنا حكايات".
0 تعليق