ازاي الحكومة هتستعيد العصر الذهبي لمنطقة وسط البلد ومنطقة مربع الوزارات الشهير وازاي هتحقق مليارات من ورا المشروع وايه هي ملامح التطوير الجديد.

زمان كانت منطقة وسط البلد في مصر اشهر من مدن باريس ولندن بفضل جمال مبانيها التاريخية واللي بناها اشهر مهندسي العالم وكانت مركز للموضة والفنادق والمقاهي الشهيرة والعلامات التجارية والاقتصادية الدولية وكانت الموضة بتنزل في محلات وسط البلد قبل ما تنزل محلات باريس قبل ما الوضع يتغير ويضربها الإهمال سنين طويلة لكن حصلت جهود كبيرة لاستعادة رونق وسط البلد على فترات متباعدة ودلوقتي الدولة بتعمل مشروع قومي حقيقي لاستعادة بريق المنطقة وإعادتها لسابق عصرها مركز مالي وتجاري وسياحي وترفيهي وثقافي هيجذب آلاف السياح سنويا ويوطن براندات عالمية في الفندقة والسياحة..

طيب الدولة ناوية على إيه في العاصمة الخديوية ومربع الوزارات ؟
شوف ياسيدي بعد بناء العاصمة الإدارية الجديدة وانتقال معظم الوزارات هناك بقي فيه ثروة عقارية مش مستغلة دلوقتي وزي ما قلنا دي ثروة لأن أغلبها مباني ضخمة وعلى مساحات كبيرة وفي أماكن مميزة جدا ودا غير أن فيه منها مقرات اثرية يعني نقدر نستغلها بشكل يحقق مليارات الجنيهات في السنة لما يتم طرحها لمستثمرين لاستغلالها في إقامة فنادق عالمية وتنفيذ مناطق ترفيهية وتجارية على مستوى عالي ودا اللي قاله الدكتور مصطفى مدبولي رئيس الحكومة في تصريحاته الأخيرة وقال فيها كمان إن الدولة مشيت خطوات جادة ضمن خطة استغلال مربع الوزارات، بجانب مشروع إحياء القاهرة الخديوية.

مدبولي كشف إن الحكومة تلقت طلبات كتيرة لاستغلال المباني الحكومية في منطقة مربع الوزارات وهى منطقة تبلغ مساحتها حوالى 900 متر x 500 متر أغلبها مبانى وزارية وإدارية من المقرر نقلها إلى العاصمة الإدارية الجديدة وإن الدولة هتطرح المباني دي بما يحقق رؤيتها التخطيطية للاستفادة من موقع المنطقة التاريخية الاستغلال الأمثل لها وحسب المهندس شريف الشربيني وزير الإسكان والمرافق والمجتمعات العمرانية المخطط العام والرؤية الاستثمارية للقاهرة الخديوية ومنطقة مربع الوزارات بتشمل استغلال مُربع الوزارات في المرحلة الأولى ومنطقة القاهرة الخديوية في المرحلة التانية وفيه مقترحات كتير لطريقة استغلال المنطقتين منها تحويل المباني الحكومية في إقامة غرف فندقية أو مساحات مخصصة للأعمال أو أماكن للإقامة أو سكن للطلاب.

طيب ايه اللي بيحصل في وسط البلد.. دلوقتي فيه خطة حكومية شاملة لتطوير وتحديث منطقة وسط البلد باريس الشرق واللي بتشمل مناطق شارع رمسيس والجلاء والأزبكية وعماد الدين، وشامبليون ومعروف وقصر النيل، وعابدين والبستان، وباب اللوق، وميدان التحرير وإنه في المرحلة دي هيتم تقسيمها إلى عدد من المناطق جزء منها هيتم فيه إقامة الفنادق وإنشاء مجمعات ثقافية وللحرف صديقة البيئة وكمان إقامة مبان إدارية ومناطق ثقافية ترفيهية ومبان تجارية إدارية وشقق سكنية، ومبان تعليمية وثقافية.

طبعا حجم المشروعات اللي هتعمل في أهم منطقتين في مصر كفيل يوفر إيرادات بالمليارات للدولة المصرية من استغلال المباني والمناطق في جذب علامات تجارية عالمية رفيعة المستوى.