الصناعة ثم الصناعة ومفيش بديل عشان مصر تنهض اكتر واكتر .. ياترى ايه اللي بيحصل في ملف الصناعة دلوقتي وايه حكاية المشروع المفاجأة اللي أعلن عنه الفريق كامل الوزير..

التفاصيل بتقول إن مصر بتواصل خططها علشان تتحول لمركز إقليمي في الصناعة والنقل بكل أشكاله وعشان تحقق دا بذلت مجهودات غير مسبوقة وخطط واضحة وتخطيط علمي عشان تحي قطاع الصناعة من تاني وتوفر الدولار وتقضي على فاتورة الاستيراد الضخمة اللي بتستنزف العملة الأجنبية وتحقق فائض دولاري للقضاء على التضخم والاسعار ترجع تستقل وتنزل من تاني..

وبدأت وزارة الصناعة بقيادة الفريق كامل الوزير في التحرك على اكتر من اتجاه أولها إزالة كل العقبات اللي بتعطل الاستثمار في الصناعة وتاني اتجاه كان تشجيع الشركات العالمية في إقامة مصانع ليها في مصر والاتجاه التالت كان إعادة النظر في المصانع المتوقفة والشركات المتعثرة وإعادة احياءها من جديد ودا اللي حصل وبدأت الأمور تتحرك بسرعة في ملف الصناعة بفضل الإجراءات اللي قلنا عليها وقبلها بناء الرئيس السيسي أهم وأقوى بنية أساسية في المنطقة واللي أدت حوافز كتير جدا السوق المصري وخلته نقطة جذب ونتيجة لدا انهالت الاستثمارات الأجنبية على مصر في الشهور الأخيرة وكان فيه جزء كبير منها في قطاع الصناعة واللي اتحول لقطاع جذب كبير للمستثمرين بسبب الميزات اللي بيحصل عليها المستثمر الأجنبي أو العربي من توافر الطرق والمحاور التجارية والقرب من المواني وخطوط التجارة العالمية ووجود قناه السويس وقرب مصر من الأسواق الهامة  بالعالم .

الحكومة استغلت كمان المواني العملاقة الجديدة في بناء مناطق صناعية ضخمة فيها بقت حديث الأوساط الاقتصادية الدوليه ودوائر المستثمرين لأن المناطق دي نموذجية بالنسبة لأي مستثمر هيضخ فلوسه في مشروع في أي منطقة اقتصادية دلوقتي في مصر بسبب توافر كل عوامل النجاح والمكسب من حيث قربها من الأسواق والموانئ وخطوط التجارة.. 

عشان كده المناطق الصناعية الجديدة في مصر عليها اقبال كبير جدا من المستثمرين الأجانب دلوقتي زي اللي بيحصل كده في المنطقة الاقتصادية لقناه السويس واللي استقبلت في شهور 8 مليار دولار استثمارات.

الجديد بقي كان إعلان الفريق كامل الوزير، نائب رئيس مجلس الوزراء للتنمية الصناعية وزير النقل والصناعة النهاردة عن منطقة صناعية ولوجستية بدمياط جديدة وشهد النهاردة توقيع مذكرة تفاهم بين الشركة القابضة للنقل البحري وشركة السويدي إليكتريك لدعم وتطوير العلاقات الاستثمارية والتجارية بين الجانبين وإنشاء وإدارة وتشغيل وتطوير منطقة صناعية لوجيستية متكاملة بميناء دمياط على مساحة 6 مليون متر مربع على مرحلتين.

حسب الوزير.. دا أول استثمار في المدينة الصناعية بغرب دمياط بيركز في إنشاء مصنع الكابلات البحرية لصالح شركة السويدي إليكتريك باستثمارات تصل إلى 500 مليون دولار وعلى مساحة 500,000 متر مربع وبكده هيكون سادس مصنع على مستوى العالم والأول في الشرق الأوسط في  المجال دا .. وكمان المصنع بيعتبر إضافة استراتيجية لمجال نقل الطاقة والبنية لانه هيساهم في مد الكابلات البحرية بين القارات وتعزيز موقع مصر كمركز إقليمي للصناعات المتقدمة.

كامل الوزير كشف كمان أن العقد يشمل تأسيس شركة مهمتها إنشاء وإدارة وتشغيل وتطوير منطقة صناعية لوجيستية متكاملة بميناء دمياط بنظام المطور الصناعي في دمياط الجديدة غرب دمياط وشركة السويدي للتنمية الصناعية هتتولي مسؤولية تخطيط المدينة الصناعية وبناء الشبكات والمرافق وتطوير البنية التحتية الصناعية لجذب المستثمرين في مختلف الصناعات اللازمة للمنطقة زي الصناعات الغذائية والسيارات، والهندسية، والبتروكيماويات وغيرها من الصناعات.