ايه الحدث المهم اللي مصر مهتمة بيه جدا بعد العيد وليه رئاسة الجمهورية بتشرف عليه بشكل مباشر وازاي هيغير شكل الاقتصاد المصري.

الرقمية وتكنولوجيا المعلومات والاتصالات دا ملف مهم جدا على مكتب الرئيس السيسي ومهتم بيه جدا لأن عارف إن المستقبل للبرمجة واقتصاد المعلومات واللي هيتخلف مش هيكون ليه مكان.. ومصر الحقيقة خطت خطوات رئيسية وكبيرة عشان تحجز لنفسها مكان في عالم تقنيات الرقمنة والاتصالات والبرمجة وفي برامج الاستثمار فيها وإعداد كوادر مصرية عالمية تقدر تقود النوع دا من الاقتصاد اللي هيقود العالم كله في الشهور والسنين الجاية..

وزير الاتصالات وتكنولوجيا المعلومات  الدكتور عمرو طلعت زكريا قال كام معلومة مهمة جدا في الساعات الأخيرة منها إطلاق خدمات الجيل الخامس لشركات المحمول الأربع في مصر خلال النص الأول من العام الجاري 2025 في خطوة بتهدف لتعزيز جودة خدمات الاتصالات ودعم متطلبات التحول الرقمي في مختلف القطاعات وقال ان تكنولوجيا الجيل الخامس هتوفر سرعات إنترنت أعلى وزمن استجابة أقل ودا هيساهم  في تحسين تجربة المستخدمين بخلاف دعم التطبيقات الحديثة زي إنترنت الأشياء، والذكاء الاصطناعي والمدن الذكية وتعزيز قدرة مصر التنافسية في قطاع الاتصالات وتكنولوجيا المعلومات.

طيب ايه علاقة الشبكة الخامسة بالاستثمار الأجنبي في مصر ؟
زي ما قلنا إن التطور التقني والرقمي وتكنولوجيا الاتصالات هتجذب شركات التكنولوجيا العالمية للاستثمار في السوق المصري باعتباره سوق ضخم بحكم عدد السكان الكبير والتطور الاقتصادي الكبير والنمو السريع وتوسيع نطاق الخدمات هيساعد في تدفق الاستثمارات المتخصصة في النوع دا من التكنولوجيا وهي بالمليارات بالمناسبة..

الحدث الأهم بقي هو إعلان  الوزير  إطلاق منصة الرواد الرقميون بعد انتهاء إجازة عيد الفطر واللي هتكون تحت إشراف مباشر من رئيس الجمهورية في خطوة تستهدف تأهيل الكوادر البشرية بمهارات متقدمة في مجالات الاتصالات وتكنولوجيا المعلومات لدعم التحول الرقمي وتعزيز الصادرات التكنولوجية كأحد محاور تنمية الاقتصاد الوطني ودا كان الحقيقة حلم من احلام الرئيس السيسي اللي اتحققت وهو بناء  وتجهيز كودار بشرية مصرية من النوابغ اللي يقدروا يعملوا فرق كبير في مجالات التكنولوجيا الرقمية.

المبادرة هتقدم منح دراسية مجانية في جميع المحافظات لشباب مصر وكل موهوب وبدون  التقيد بالمؤهل الدراسي أو الخبرة العملية، لإتاحة الفرصة لأكبر عدد ممكن من الراغبين في تطوير مهاراتهم وتشمل برامج التدريب عدد من التخصصات الحديثة زي الذكاء الاصطناعي وعلوم البيانات والأمن السيبراني وتطوير البرمجيات والشبكات والبنية التحتية الرقمية والفنون الرقمية وتصميم الدوائر الإلكترونية وبناء النظم المدمجة... يعني حضرتك تقدر ببساطة تتخيل اللي ممكن يحصل من وراء المبادرة الجديدة وازاي هيكون عندنا آلاف الشباب الموهوبين في تكنولوجيا المعلومات والاتصالات والرقمنة والبرمجة وحجم التأثير اللي ممكن يعملوه في الاقتصاد المصري.