إزاي الارقام في الاقتصاد المصري هزمت منصات الفتنية وكذبت تصريحات مسؤول أمريكي رفيع المستوى.. وياترى الارقام دي قالت إيه وايه اللي جاي بعدها.

على مدار سنين طويلة جماعات الشر وشياطين السوشيال ميديا الخاصة بيها وهي بتحرض ضد الدولة المصرية وبتشوه كل انجاز بيتم وبتقلب الحقايق والارقام وتبشر بالانهيار الاقتصادي والافلاس المالي وشفنا دا في أزمة الدولار من سنتين وإزاي روجو إن الدولار هيوصل  لأرقام فلكية وإن وزراء الحكومة بدأو يهربوا للخارج واكتر من كده بكتير.. لكن مصر متهزتش بالاكاذيب وحملات التضليل واستمرت في بناء الاقتصاد وتحدي الظروف الصعبة جدا اللي مرت بيها بسبب الاحداث الغير المسبوقة والتوترات في المنطقة والعالم.

النهاردة مصر بتجني ثمار تعب السنين اللي فاتت والأرقام كلها بتقول إن الدولة عبرت عنق الزجاجة ونجت من العاصفة بمزايا كتير جدا وحولت المحنة إلى منحة وبالعكس سخرت الأزمة في بناء اقتصاد أقوي بيعتمد على التصنيع والانتاج والكفاية والتصدير.

وحسب اخر بيانات رسمية الاقتصاد المصري حقق أسرع وتيرة نمو فصلية من أكتر من سنتين مدفوع بالتطور الكبير في قطاعي الصناعة المحلية والصادرات ودا حصل  رغم تراجع نشاط قناة السويس..

وزارة التخطيط والتنمية الاقتصادية والتعاون الدولي كشفت في الساعات الأخيرة إن الناتج المحلي الإجمالي لمصر ارتفع بنسبة 4.3% في الربع التاني من السنة المالية الجارية مقارنةً بـ2.3% في نفس الفترة من العام المالي السابق وإن دا بيعتبر أعلى معدل في 9 فصول مالية وتحديدا من الربع التالت من 2022 وهو بداية تاريخ أزمة  الدولار مع اندلاع الصراع الروسي الأوكراني وخروج الاموال الساخنة وظهور الفجوة الدولارية والسوق السودا.

التحسن الكبير في أداء الاقتصاد المصري وراه تعب وجهد كبير جدا وحسب البيانا القفزة في الناتج المحلي والنمو الاقتصادي جت بدعم من الصناعات التحويلية والسياحة وتحسن استثمارات القطاع الخاص رغم استمرار تراجع إيرادات قناة السويس، بسبب الاضطرابات في البحر الأحمر وكمان التحسن الشامل في كل قطاعات الدولة الاقتصادية من تحويلات المصريين والتجارة الدولية والتوسع الزراعي وصناعة التعهيد وزيادة النشاط التجاري في المواني والشراكات الاقتصادية الدولية.

كل الأسباب اللي فاتت بتقول حاجة مهمة وبتأكد عليها كمان وهي أن مصر قدرت تواجه أصعب الأزمات في الفترة اللي فاتت وبالتالي قادرة تستوعب اي هزات تحصل على المستوى الدولي او الاقليمي بخصوص التجارة الدولية وكمان الارقام بتقول إن الدولة المصرية أبعد مايكون عن الافلاس المالي أو الركود الاقتصادي أو معدلات البطالة العالية زي ما ادعى وزعم ستيف ويتكوف المبعوث الامريكي للشرق الاوسط وصاحب الاصول اليهودية لما اتكلم بالاكاذيب عن الاقتصاد المصري والدولة المصرية وجت الارقام الاخيرة عشان تكذبه وترد على أوهامه.