كل شوية نسمع عن حاجة اسمها أذون خزانة.. سندات حكومية.. عمليات السوق المفتوحة.. بس الحاجات دي معناها إيه؟ وليه البنك المركزي هو اللي بيتحكم فيها؟ إيه أدوات الدين اللي بيصدرها البنك المركزي؟ وإيه الفرق بين كل أداة والتانية؟
فى البداية كده .. يعني إيه أدوات الدين؟
ببساطة.. أدوات الدين دي عبارة عن وسائل الدولة بتستخدمها علشان تجيب فلوس من السوق.. زي ما شخص ممكن ياخد قرض من البنك علشان يمول مشروعه.. الحكومة كمان بتحتاج فلوس علشان تمول مشروعاتها وتسدد التزاماتها.. لكن بدل ما تاخد قرض مباشر.. بتصدر أدوات دين وتبيعها للمستثمرين والبنوك.
ليه البنك المركزي هو اللي بيطرحها مش وزارة المالية.
هنا بقى السؤال المهم.. ليه البنك المركزي هو اللي بيتحكم في إصدار أدوات الدين الحكومية مش وزارة المالية؟
الحكاية ببساطة إن البنك المركزي هو المسؤول عن السياسة النقدية.. يعني هو اللي بيحافظ على استقرار الجنيه.. وبيتحكم في التضخم.. وبيحاول يوازن بين كمية الفلوس اللي في السوق.. علشان كده.. هو اللي بيدير عمليات الاقتراض دي من خلال أدوات الدين علشان يضمن إن السوق مش بيتخنق بالفلوس ولا بيحصل تضخم جامد.
أما وزارة المالية.. فهي المسؤولة عن إدارة الموازنة العامة للدولة.. يعني عندها مصاريف وإيرادات.. ولو الفلوس اللي عندها مش كفاية.. بتلجأ للبنك المركزي علشان يساعدها في الاقتراض.
طيب.. إيه هي أدوات الدين اللي بيصدرها البنك المركزي؟
البنك المركزي عنده أكتر من أداة بيستخدمها في الاقتراض.. تعالوا نشرح الفرق بينهم ببساطة.
أول حاجة أذون الخزانة.. دي أوراق مالية قصيرة الأجل.. مدتها بتتراوح من 3 شهور لـ سنة.. والحكومة بتصدرها علشان تمول احتياجاتها السريعة.. زي إنها تسد عجز الموازنة أو تدفع التزامات مستعجلة.
المستثمرين والبنوك بيشتروا الأذون دي مقابل عائد ثابت.. وكل ما كانت مدتها أطول.. كل ما العائد بيكون أعلى.. والميزة هنا إن الاستثمار فيها آمن جدًا لأن الحكومة بتضمن الفلوس.. لكن العائد مش كبير قوي.
وتاني حاجة السندات الحكومية .. السندات زي أذون الخزانة.. لكنها طويلة الأجل.. بتتراوح من سنة لـ 30 سنة.. وبتدي عائد أعلى من الأذون لأنها مدتها أطول.. والمستثمرين بيكسبوا من الفوائد اللي بتدفعها الحكومة بشكل دوري.
السندات بتستخدمها الحكومة علشان تمول مشروعات كبيرة.. زي البنية التحتية والكباري والموانئ.
وفيه كمان عمليات السوق المفتوحة، دي بقى أداة البنك المركزي بيتحكم بيها في كمية الفلوس اللي في السوق.. لو البنك المركزي عايز يقلل التضخم ويسحب سيولة من السوق.. بيبيع سندات للبنوك علشان يمتص الفلوس الزيادة.. ولو عايز يزود السيولة ويحفز الاقتصاد.. بيشتري السندات من البنوك علشان يحط فلوس أكتر في السوق.
طب إيه فايدة الحاجات دي؟
الحكومة بتستخدم الأدوات دي علشان توفر تمويل سريع لمشروعاتها بدل ما ترفع الضرائب أو تقلل الإنفاق.
و البنك المركزي بيستخدم الأدوات دي علشان يوازن بين كمية الفلوس اللي في السوق وما يحصلش تضخم جامد.
والمستثمرين الأجانب والمحليين بيشوفوا في السندات وأذون الخزانة فرصة آمنة للاستثمار بعائد مضمون.
خلاصة الكلام .. أدوات الدين اللي بيصدرها البنك المركزي هي وسيلة الحكومة للاقتراض من السوق.. وكل أداة ليها دورها ومدتها المختلفة.. البنك المركزي هو اللي بيتحكم فيها علشان يحافظ على استقرار الاقتصاد وما يحصلش تضخم جامد.. ولو الأدوات دي استخدمت صح.. الاقتصاد هيكون في حالة توازن واستقرار.
0 تعليق