مصر بتغير قواعد اللعبة في سوق السيارات بالمنطقة.. ايه اللي بيحصل وايه الحكاية وازاي مصر بتتحول لمركز إقليمي لصناعة السيارات في الشرق الأوسط.

زي ما احنا عارفين إن ملف الصناعة في مصر بقي الملف الأهم في الدولة من ساعة تولي الفريق كامل الوزير لحقيبة الصناعة وشفنا انتفاضة صناعية غير مسبوقة وخطط طموحة هتغير المعادلة والإنتاج والتصدير بتتنفش دلوقتي على أرض الواقع واهم بند فيها كان توطين الصناعات بكل أشكالها خاصة الصناعات الاستراتيجية واللي مصر بتشتوردها بشكل كبير جدا وبتستنزف مواردها الدولارية ودا غير حل مشكلة آلاف المصانع المتعثرة والمتوقفة وتغيير القوانين والإجراءات وتبسيط الإجراءات لتشجع الاستثمار في الصناعة..

وعلى مدار الشهور اللي فاتت شفنا تدفقات ضخمة من الخارج للاستثمار في القطاع الصناعي وخاصة السيارات والأدوية والصناعات الهندسية والغذائية وغيرها ولأول مرة نشوف قفزة في التصدير ودي مجرد البداية.

والنهاردة هنتكلم عن ملف صناعة السيارات في مصر ودا بسبب التطورات السريعة في الصناعة الاستراتيجية والمهمة جدا والحكاية بدأت بتوجيهات الرئيس السيسي بتوطين الصناعات المهمة في مصر وبجودة عالية وبعد التوجيه الرئاسي بدأت صناعة السيارات في مصر تاخد منحنى جديد للانطلاق وبدأت الدولة بإعادة تأهيل وتطوير شركة النصر للسيارات واللي رجعت من تاني وحش صناعي في مصر والمنطقة وبالتوازي مع دا شجعت مصر الشركات العالمية في الصناعة دي على الاستثمار في مصر وإقامة مصانع ليها في مصر وفي الوقت نفسه الدولة شجعت شركات السيارات المصرية الموجودة في السوق على توسيع استثماراتها ومشروعاتها.

طيب ايه الجديد في ملف صناعة السيارات ؟
زي ما قلنا  مصر دلوقتي بتنفذ استراتيجية وطنية لتوطين إنتاج السيارات وتحولها لمركز إقليمي وسنة 2025 الحالية بتعتبر محورية في ملف التوطين وإعادة تشكيل قطاع السيارات في مصر بمساعدة شركات صناعة السيارات العالمسة وخاصة الصينية العملاقة..

سفير الصين في القاهرة طلع واتكلم عن  سوق السيارات في مصر وقال إنه بيشهد تحولات كبيرة وإن السيارات الصينية بأسعارها التنافسية بتلعب دور بارز في خفض أسعار السيارات الجديدة وإعادة تشكيل القطاع وقال إن مبيعات السيارات الصينية في مصر ارتفعت بنسبة 33.6% خلال الفترة من يناير إلى نوفمبر 2024. 

وحسب السفير الشركات الصينية بتواصل توسيع استثماراتها في مصر من خلال افتتاح مصانع محلية وتعزيز القدرة الإنتاجية وتوفير السيارات بأسعار تنافسية ودا  بفضل الاستثمارات الضخمة في صناعة السيارات المحلية.. الخلاصة إن مصر  مصرة أنها تكون مركز إقليمي لصناعة السيارات وقطع الغيار وخلال الشهور اللي الباقية في 2025 هنشوف تحول كبير في الملف دا وهتكون عندنا صناعة سيارات قوية ودا هينعكس بشكل مباشر على أسواق الصرف وتوفير الدولار من الاستيراد وبعدها هندخل في مرحلة التصدير.