أكد محمد إبراهيم البسطاويسي ضحية نمر سيرك طنطا تفاصيل فقدانه لذراعه خلال مشاركته في العمل بتقديم أحد العروض.

وقال البسطاويسي في مداخلة مع برنامج "الحكاية" المذاع على قناة "إم بي سي مصر": "كنت شغال مساعد مدرب أسود ومساعدين المدربين مش بيلبسوا يونيفورم لأننا مش بنشتغل ضمن طاقم السيرك، من عشرة رمضان والحيوانات جعانة ومفيش أكل ومفيش حمير".

وأضاف: "المدرب وهو جوة في سيطرة كاملة وليه هيبة، من جوة حاجة ومن برة حاجة تانية، أنا مهمتي كان أني أربط النمر الأصفر بعد ما خلص العرض بتاعه".

وتابع: "المدربة ضربت النمر بالكرباج وخاف ومن كتر جوعه وأنا كنت لابس قميص مخطط أحمر والنمر كان بينتقم مني وأنا شوفت يوم محدش شافه".

وأوضح: "أنا دخلت أيدي عشان أنا بربط النمر ودا شغلي، النمر مسك في أيدي في اللحظة دي والمفروض في شوكة وقناصة منوم وطفايات حريق والدفاع المدني بتاع الماية".

وأكمل: "الكابتن أنوسة كوتة لو مكانتش فضلت النمر عني كانت موتت النمر، النمر قعد يشدني ولو مكانش عندي صحة شوية كان النمر هيقلب بيا القفص وكان هيطلع على الجمهور".

واختتم: "أنا اللي جريت وطلعت إيدي من القفص وجريت طلعت برة وقلت للناس عايز ماية أشربها ولقيت راجل معاه عربية نص نقل وخدني على المستشفى أنوسة كوتة عملت فيديو ومشيت ومفيش حد من السيرك جه بص عليا".