يا ترى ايه اللى هيحصل إيه في الاقتصاد المصري الفترة الجاية؟ و سعر الفائدة هينزل ولا هيثبت؟ وهل تحذير صندوق النقد الدولي ممكن يأثر فى قرار لجنة السياسة النقدية؟ وامتى اصلا اللجنة هتعقد اجتماعها الجاي؟

باقي اقل من 20 يوم وهتعقد لجنة السياسة النقدية بالبنك المركزي المصري تالت اجتماع ليها فى 2025 .. والاجتماع هيكون تحديدا يوم الخميس 22 مايو 2025.. واللي هيحدد مصير أسعار الفايدة على الإيداع والإقراض للفترة الجاية .. الاجتماع ده بييجي بعد ما البنك المركزي قرر في اجتماعه اللي فات يوم 17 أبريل 2025 يخفض الفايدة بواقع 225 نقطة أساس .. يعني نزل سعر الإيداع لليلة واحدة لـ24.75% وسعر الإقراض لـ25.75% .. قرار كان مفاجأة لناس كتير.

بس يا ترى هل هيستمر الخفض ده؟ .. ولا المركزي هيغير المسار؟
خلينا نشوف توقعات الخبراء .. فيه إجماع كبير بين المحللين إن البنك المركزي ممكن يبقى حذر شوية المرة دي .. يعني بدل ما يخفض الفايدة تاني .. فيه احتمال كبير إنه يثبتها عند المستويات الحالية .. ليه بقى؟ .. عشان معدلات التضخم لسه فيها تقلبات .. صحيح إن التضخم نزل بشكل ملحوظ في فبراير 2025 لـ12.8% على مستوى الحضر حسب الجهاز المركزي للإحصاء .. بس الصدمات الاقتصادية العالمية زي الرسوم الجمركية الجديدة اللي فرضها الرئيس الأمريكي دونالد ترامب على 65 دولة .. ممكن تضغط على الاقتصاد المصري وترجع التضخم يزيد .. يعني لو المركزي خفض الفايدة بسرعة .. ممكن الجنيه يتعرض لضغوط تانية وده يأثر على استقرار السوق.

هنا بقى نوصل لجزء مهم .. وهو تحذير صندوق النقد الدولي .. الصندوق طلع وقال للبنك المركزي المصري: "بلاش تتسرع في خفض الفايدة".. وقال إن القرار اللي قرار المركزي في أبريل 2025 كان "سابق لأوانه".. ليه؟ .. عشان الصدمات الاقتصادية العالمية لسه مستمرة .. والتضخم ممكن يرجع يقفز لو السياسة النقدية اتسهلت أوي.. تحذير الصندوق ده زي إشارة حمراء للمركزي.. يعني لو خفضوا الفايدة تاني في مايو.. ممكن يحطوا الاقتصاد في موقف صعب.. خصوصا إن الصندوق عنده تأثير كبير على ثقة المستثمرين الأجانب في مصر.

طيب .. إيه تأثير كل ده على الناس العادية؟

لو البنك المركزي ثبت الفايدة .. تكلفة القروض هتفضل مرتفعة .. يعني لو بتفكر تاخد قرض عشان تشتري عربية أو تبدأ مشروع .. هتدفع فوايد عالية .. من ناحية تانية .. لو الفايدة نزلت فعلا .. ممكن الاقتراض يبقى أسهل وده يحرك السوق ويزود الاستثمارات .. بس زي ما قولنا .. الخفض ده لو حصل بدري أوي .. ممكن يزود التضخم ويخلي أسعار السلع ترتفع أكتر .. يعني اللبن والبيض والفراخ اللي بنشتريهم كل يوم ممكن يغلوا تاني
الأكيد ان  اجتماع 22 مايو 2025 هيبقى زي مباراة مصيرية في الدوري.. كل العيون هتبقى على البنك المركزي.. هيثبت الفايدة عشان يحافظ على استقرار الجنيه؟ .. ولا هيخاطر ويخفضها عشان يدي دفعة للاقتصاد؟ .. وهل هياخد كلام صندوق النقد الدولي على محمل الجد؟ .. الأيام الجاية هتجاوب على الأسئلة دي.