ليه منصات الإخوان نشطت في الساعات الأخيرة ضد الدولة المصرية.. وايه قصة الصفقة اللي تمت في خيال السوشيال ميديا..وايه المقصود من نشر الأكاذيب والفتنة في الوقت دا بالذات.. وبرنامج الطروحات الحكومية وصل لغاية فين.
في الساعات الأخيرة انتشرت أخبار على منصات بعينها في السوشيال ميديا ومواقع التواصل الاجتماعي ومعروفة بسياستها المعادية للدولة حولين صفقة سرية وكمان بالأمر المباشر لبيع أحد البنوك وللاسف منصات كتير وحسابات في السوشيال ميديا اخدت الاخبار دي على أنها حقيقة مسلم بيها وبدأت تروج لها وطبعا دي كلها أكاذيب وتضليل ومفيش منها حرف حقيقي لأن مصر مش هتعمل حاجة في السر ولا الحكومة خايفة من حاجة ولا فيه سبب يخلي صفقة بالحجم دا تتم من غير ما يطلع بيها بيان رسمي..
المعروف والأكيد إن مصر بتنفذ برنامج الطروحات الحكومية بكل قوة وشفافية وكمان مش مستعجلة فيه ولا عليها ضغوط زي الاول عشان تفرض في حصص شركات أو بنوك بعد توافر الدولار وخروج البلد من عنق الأزمة المالية يعني مفيش سبب يخليها تعمل صفقات في الضلمة كمان الحكومة وفي عز أزمة الدولار رفضت تبيع حصص في شركات وبنوك عشان شافت أن السعر مش عادل ولا يعبر عن قيمة الحصص زي وطبيعي اللي مفرطش في حق الدولة في الأزمة ووقت ماكان محتاج مش هيفرط فيها لما الأمور اتحسنت..
طبعا كل دي إشاعات لنشر البلبلة في توقيت المنطقة فيه بتمر بظروف صعبة بسبب الأحداث اللي حولينا وعشان تشوه أو تغطي على الإنجازات اللي الدولة المصرية عملتها وقدرت بيها تتجاوز الأزمات وتسترد قوة الاقتصاد وتحسنت المؤشرات الاقتصادية بشكل كلي وزادت التدفقات النقدية وتضاعفت الاستثمارات ودا غير شهادات الثقة الدولية في الاقتصاد المصري وأنها تخطت اي أزمة وآخرها شهادة صندوق النقد واللي قررت يصرف الشريحة الرابعة من القرض المصري وكمان يدي مصر قرض إضافي خاص بدعم التنمية والاستدامة ودا غير تقارير وكالات التصنيف الائتماني الدولية واللي توقعت إستمرار التدفقات الدولارية لمصر وتحسن اضافي في معدلات النمو ودا كله خلي منصات الفتنة تطلع تقول اي حاجه.
طيب ملف الطروحات وصل لغاية فين ؟
عشان تبقى عارف الدولة المصرية والحكومة كانت واضحة جدا في الملف دا وأعلن الدكتور مصطفى مدبولي إن الحكومة ماشية في برنامج الطروحات الحكومية وفق مخطط زمني وإن مفيش شركات هتتباع أو بنوك غير بالسعر العادل للدولة المصرية وأن الهدف من الطروحات دلوقتي هو تطوير الشركات دي وتحديثها بضمان ضخ استثمارات جديدة فيها بعد البيع وزيادة نشاطها وانتاجيتها وأن الهدف منها مبقاش بس الحصول على الدولار لأن الأزمة انتهت مع زيادة التدفقات.
وحسب المصادر والتوقعات برنامج الطروحات هيشهد عودة أقوى في الشهور الباقية من 2025 لدعم الاقتصاد الخاص وتخارج الحكومة من الأنشطة الاقتصادية والسماح بالمنافسة العادلة واللي بتنعكس على جودة الإنتاج واتساع النشاط الاقتصادي بشكل عام وتعظيم القيمة المضافة لكل القطاعات.. الخلاصة اي صفقة يتم في برنامج الطروحات الحكومية بيتم الاعلان عن تفاصيلها وبالارقام ومفيش حاجة بتستخبي في عالم الاقتصاد لأن فيه إجراءات قانونية كتير بتتاخد ولازم يتم الإعلان عنها ولو مصر خبت اللي اشتري مش هيخبي بالعكس دا بيعلن عشان يعمل دعاية ليه.. يعني متصدقوش اي اخبار ملهاش أساس.
0 تعليق