السوشيال ميديا كله عمال يحذر من الطماطم، وده بعد انتشار مقطع صوت على الواتساب بيقول إن الطماطم اللي فيها ثقوب سوداء دي سببها عضة تعبان.

طبعا الناس بدأت تشير مقطع الصوت لبعضها وكله اتوتر، وناس بدأت تقول الطماطم هتسبب الوفاة، ايه اللي بيحصل يا جماعة لحقتوا تنشروا الخبر بالسرعة دي، وهل فعلا في تعبان عض الطماطم يعني وكلنا هنموت لو كلناها.

الدكتور عبد الحميد حبشي، وده استاذ بمعهد الإنتاج ورئيس قسم الخضر ذاتية التلقيح الأسبق (قسم بحوث الطماطم)، أكد إن الكلام ده مش مظبوط أكيد، ووصف اللي بيحصل بالتهريج.
طيب والثقوب السوداء اللي في الطماطم دي جايه منين عشان نطمن، هو قال إن سببها هو حشرة عادية جدا، ومفيهاش أي ضرر على صحتنا
وأكد كلامه وكمان وقال تعابين ايه اللي هتاكل طماطم، التعابين بتاكل لحوم مش نباتات.
ونقيب الفلاحين كمان حسين أبو صدام، أكد أن الحشرة دي أسمها سوسة الطماطم وبتحصل عادي في المحصول، وبتأثر بس على الإنتاج يعني بيكون أقل من طبيعته لكن ملهاش أي ضرر على صحتنا.