يا ترى ايه سبب زيارة الرئيس السيسي لروسيا النهاردة ؟وايه حكاية الاجتماعات المهمة اللى رايحة يحضرها ؟وايه تاثير الاجتماعات دي على أزمات زي نقص العملة والضغط على الاحتياطي النقدي وكمان تقليل فاتور الاستيراد؟ وهل فعلاً ممكن نشوف تغييرات جديدة في مستقبل الاقتصاد المصري بعد الاجتماعات دي؟

الرئيس عبدالفتاح السيسي بيشارك  في قمة تجمع بريكس السنوية  اللي انطلقت النهاردة، الثلاثاء 22 أكتوبر 2024، في مدينة كازان الروسية، واللي هتستمر لحد يوم 24 أكتوبر.. ودي أول مشاركة لمصرفى الاجتماعات ديبعد اعتمادها رسميا عضوا فى بريكس من يناير اللى فات

و قمة البريكس السنة دي بتعتبر واحدة من أهم الأحداث الاقتصادية اللي بتحصل في العالم دلوقتي، خصوصاً بعد التحديات الاقتصادية اللي العالم كله بيمر بيها من التضخم اللي ضرب معظم الدول لأزمات الطاقة والغذاء اللي بقت تهدد استقرار الاقتصاد العالمي للتوتر الكبير اللى بيحصل فى الشرق الأوسط

ومصر بمشاركتها في القمة دي بتثبت إنها مش مجرد دولة مشاركة لكن كمان شريك قوي ومؤثر في صنع قرارات مهمة بتمس الاقتصاد العالمي.. إحنا بنتكلم هنا عن تجمع من أكبر الاقتصادات الناشئة في العالم بيضمدول مهمة زي البرازيل، روسيا، الهند، الصين، وجنوب إفريقيا. دول بيجمعها طموح مشترك لتغيير موازين القوة الاقتصادية في العالم بعيداً عن الهيمنة الغربية التقليدية.. بالاضافة لدول جديدة بتسعى للبحث عن مصالحها وتأمين احتياجاتها من بينهم مصر والسعودية

وانضمام مصر مؤخراً لبريكس كان خطوة قوية نحو توسيع التعاون مع دول بتحمل رؤية اقتصادية مختلفة وبتسعى لتعزيز العلاقات الاقتصادية بينها وبين بعضها

في القمة دي .. الرئيس السيسي هيكون ليه دور محوري في مناقشة ملفات مهمة زي الأمن الغذائي، الطاقة، وتطوير البنية التحتية في الدول النامية.. كمان مصر هتقدم رؤيتها عن إزاي الدول الأفريقية ممكن تستفيد من تعاون أوسع مع دول البريكس، خصوصاً في مجال الطاقة المتجددة، والتكنولوجيا، والتجارة.

السؤال اللي بيطرح نفسه إيه اللي ممكن تكسبه مصر من المشاركة في قمة البريكس المرة دي؟ وهل هتشوف فرص استثمارية جديدة؟

الحقيقة إن مصر بتحاول تستفيد من التجمع ده على أكتر من مستوى .. أولاً من المتوقع إننا نشوف دعم لمشروعات البنية التحتية، زي تطوير الموانئ والطاقة المتجددة.. و ثانيا مصر بتحاول تستقطب استثمارات في قطاعات زي الزراعة والتكنولوجيا خصوصاً مع وجود دول زي الصين والهند اللي عندهم خبرة كبيرة في المجالات دي.

كمان، مصر بتسعى لزيادة حجم التجارة بينها وبين دول البريكس..وده هيكون له تأثير مباشر على الاقتصاد المصري من خلال تقليل الاعتماد على الأسواق الغربية وفتح أسواق جديدة للمنتجات المصرية.. تخيل معايا مثلاً لو زادت صادراتنا لأسواق زي الصين والهند، ده هيعمل طفرة في ميزان المدفوعات وهيقوي الجنيه المصري قدام التحديات اللي بيمر بيها.

من جهة تانية.. القمة دي ممكن تمثل فرصة لتبادل الخبرات والاستفادة من تجارب الدول التانية اللي قدرت تتخطى تحديات مشابهة للي مصر بتواجهها حالياً.. يعني مثلاً،الهند قدرت تعمل قفزات كبيرة في مجال التكنولوجيا والابتكار فهل ممكن نشوف شراكات بين البلدين في المجال ده؟ وهل ممكن نلاقي حلول مبتكرة للتحديات اللي مصر بتمر بيها من خلال التعاون مع دول البريكس؟

كمان قمة البريكس فى حضور الرئيس السيسي هتناقش التوسع فى اتفاقيات تبادل العملات المحلية بيم دول التجمع .. ودي اتفاقيات من خلالها بيتم التخلي عن التعامل بالدولاروتسوية التعاملات التجارية بالعملة المحلية يعنى مثلا لو هنستوردحاجة من الصين ندفع باليوان وهما لو هياخدوا مننا حاجة يدفعوا بالجنية وهكذا

الأكيد ان مشاركة الرئيس السيسي في قمة بريكس بتيجي في وقت حساس جدا بالنسبة للاقتصاد المصري والعالمي.. العالم كله بيدور على حلول جديدة للتحديات الحالية، وقمة البريكس بتقدم فرصة لمصر إنها تكون جزء من الحل. هنشوف إيه اللي هيخرج من القمة دي؟ وإزاي مصرممكن تحقق أقصى استفادة من عضويتها فى التجمع ؟