هل ممكن ييجي يوم يبقى ونشوف  فيه الدولار مجرد عملة عادية مش مسيطرة على الاقتصاد العالمي؟ يا ترى إيه اللي بيحصل في اجتماعات بريكس دلوقتي في قازان الروسية؟ وإيه حكاية العملة البديلة للدولار اللي بيتكلموا عنها؟ وهل فعلاً الأعضاء في بريكس يقدروا يتحرروا من هيمنة ونفوذ الدولار؟ .. فى الفيديو ده هنجاوبك على الأسئلة دي كلها وهنقولك إيه اللي بيحصل في الكواليس

في الساعات الأخيرة وفي مدينة قازان الروسية بدأت اجتماعات قمة تجمع بريكس السنوية والمواضيع المطروحة السنة دي مش بسيطة خالص. الدول الأعضاء (البرازيل، روسيا، الهند، الصين، وجنوب أفريقيا) ومعاهم الدول الجديدة اللى انضمت لبريكس بيتكلموا بجدية عن إطلاق عملة بديلة للدولار … والهدف إنهم يحاولوا يقللوا من اعتمادهم على العملة الأمريكية اللي بتمثل جزء كبير من السيطرة الاقتصادية العالمية

طب ليه دول بريكس مهتمة بالموضوع ده؟

الدول دي بتمثل جزء كبير من سكان العالم واقتصادياتهم بتتوسع بسرعة لكن المشكلة اللي دايمًا كانت بتواجههم هي إن الدولار الأمريكي هو العملة الرئيسية في التجارة العالمية.. وده بيخليهم تحت رحمة السياسة المالية الأمريكية، اللي مش دايمًا بتتوافق مع مصالحهم الاقتصادية.. كمان الولايات المتحدة ارتكبت خطأ كبيرلما استخدمت عملتها كسلاح ضد روسيا بعدغزو اوكرانيا وطرد موسكو من لانظام المالى العالمي وتجميد اصول روسية بمليارات الدولارات

وفى كواليس اجتماع قازان أعضاء بريكس بيتكلموا عن فكرة إطلاق عملة مشتركة بديلة للدولار.. الهدف منها هو إنها تبقى عملة موحدة للتجارة بين الدول الأعضاء في المجموعة.. وده لو حصل فعلاً هيكون خطوة كبيرة في الاتجاه ده

السؤال اللي بيطرح نفسه هنا.. هل العملة دي فعلاً هتنجح وتقدر تنافس الدولار على الساحة العالمية؟

طبعا استحداثعملة احتياط عالمية  مش هيحصل بين يوم وليلة لكن اللى بيحصلدلوقتي مؤكد هيكونليه تأثيرات سلبية على العملةالأمريكية على المدى البعيد .. كمان في نفس الوقت بريكس بتركز على اتفاقيات تبادل العملات المحلية بين الدول الأعضاء.. يعني بدل ما يعتمدوا على الدولار في التعاملات التجارية بينهم هيستعملوا عملاتهم المحلية زي الروبل الروسي أو اليوان الصيني… والفكرة هنا إنهم يقللوا من احتياجهم للدولار وبالتالي يقللوا من تأثير الاقتصاد الأمريكي عليهم

طب ايه تاثير الخطوات دي على دول بريكس ومنهم مصر طبعا؟

الخطوات دي لو اتنفذت ممكن تساعد دول بريكس إنها تتحرر تدريجياً من هيمنة الدولار..  بس، طبعاً الموضوع مش سهل ومش هيحصل بين يوم وليلة الدولار الأمريكي بقاله عقود هو العملة المسيطرة في التجارة الدولية والبنوك المركزية حول العالم بتحتفظ باحتياطيات ضخمة بالدولار

وروسيا اللي بتستضيف الاجتماعات الحالية عندها مصلحة كبيرة في الموضوع ده.. بعد العقوبات الاقتصادية اللي اتفرضت عليها نتيجة الحرب في أوكرانيا.. وهي بتحاول تدور على حلول بديلة بعيداً عن النظام المالي الأمريكي اللي مسيطر على جزء كبير من التجارة العالمية.

أما الصين فهي تاني أكبر اقتصاد في العالم..  ودايمًا بتحاول تزود من استخدام عملتها اليوان في التعاملات التجارية الدولية و شايفة إن ده هيزود من قوة اقتصادها وهيحررها من التأثيرات السلبية اللي ممكن تحصل بسبب تقلبات الدولار

الهند وجنوب أفريقيا والبرازيل عندهم نفس الدوافع تقريباً.. ودول بريكس كلها بتسعى لإنها تلاقي طرق جديدة للتعامل بعيدًا عن سيطرة الدولار وده مش معناه إنهم هيستغنوا عنه تماماً لكن الفكرة هي إنهم يقللوا من اعتمادهم عليه بشكل تدريجي.

السؤال الهم فى اخر كلامنا هل هنشوف بريكس فعلاً تطلق عملة جديدة تنافس الدولار؟ وهل هيقدروا الدول الأعضاء إنهم يتحرروا من النفوذ الاقتصادي الأمريكي؟

الاجتماعات في قازان لسه شغالة والقرارات اللي هتطلع منها هتحدد شكل المستقبل المالي للعالم.. و في كل الأحوال إحنا قدام مرحلة جديدة في النظام المالي الدولي ومعركة للسيطرة على الاقتصاد العالمي