سمعنا كتير عن فلوس مزورة منتشرة في السوق، لكن هل عمرك سالت نفسك ازاي الدولة بتأمن الفلوس من عمليات التزوير علشان تكون معروفة عن الفلوس المزورة.. واية الحاجات اللي بتميز الفلوس السليمة عن غيرها المزورة..
علي مر التاريخ حصلت محاولات كتيرة لتزوير العملات النقدية من فئات مختلفة خصوصا فئات الـ100 جنية وال 200 جنية ، خصوصا أنهم اعلي الفئات النقدية اللي موجودين في مصر، والأجهزة الأمنية علي طول السنين اللي فاتت مسكت محاولات كتيرة لتوزيع عملات نقدية مزيفة في السوق، علشان تتوه وسط العملات الرسمية بهدف تكوين ثروة من العملات المزيفة عن طريق استبدالها بعملات رسمية.
طبعا انت اكيد دلوقتي السؤال اللي جه في دماغك وهو ازاي انا كمواطن مش خبير في سوق الأوراق المالية اعرف افرق ازاي العملات الرسمية عن العملات المزيفة؟ ومن غير ما تلف ولا تحتار، فالحكومة عملت اكثر من حاجة تقدر من خلالها تميز العملات الرسمية عن العملات المزيفة.
العملات فئة 100 جنيه بتكون فيها الطباعة بارزة بدون حبر للمكفوفين، ده غير أن بيكون فيها علامات مائية لصورة تمثال الملك أبو الهول وقيمة فئة 100 جنية واللي بتكون ظاهرة وأكثر شفافية، وبيكون فيها شريط تأمينى مكتوب عليه رقم الفئة بطريقة التفريغ، وكمان شريط تأمينى متغير حركيا في زاوية الرؤية.
عمليات التأمين اللي الحكومة عملتها لفئة الـ100 جنية بتتضمن كمان أنها بتكون مطبوعة بطريقة دقيقة جدا وبتظهر فيها خطين متوازيين، ده غير وجود عنصر تطابق التسجيل الطباعي وده عبارة عن جزء من عين حورس فى الوجه وبيكون متكامل في ظهر الورقة وقت النظر فيه من خلال الضوء، والطباعة بتكون بارزة وبملمس مميز وبيظهر رقم الفئة 100، ده غير أنه ييكون عليها حبر مغناطيسي متغير في اللون والحركة وقت تغيير زاوية الرؤية.
اما العملات فئة 200 جينة واللي بدأ ظهورها في مصر سنة 2007 واول ظهروها كانت بالمقاس الكبير 8 × 17.5 سم، وسنة 2009، الحكومة اصدرت قرار بتعديل مقاس الفئات 200 جنية، وبقي مقاسها الجديد 7.2 × 16.5 سم، والحكومة ميزتها بشوية مميزات استحالة تلاقيها في الفلوس المزورة أولهم أن ملمسها بارز، وفيها علامات مائية كتيرة وحبر مغناطيسي متغير اللون.
وعلشان نكون عارفين أن بداية ظهور العملات الورقة بدا في مصر من فترات بعيدة جدا، وبدأت الدولة تعمل وسائل التأمين علي العملات الورقية سنة 1968، وكانت البداية من خلال العلامات المائية الموحدة لكل الفئات، وبعد كده عمليات التأمين اتطورت وتم اضافة الشرائط التأمينية وبعدها الحكومة اضافت عناصر متغيرة بصرية فى أحبار الطباعة وإضافت كمان عناصر ضد التصوير الملون لكل الفئات، واخيرا في 2012 الحكومة اضافت علامات مائية بتكون مخصصة لكل فئة على لوحدها .
0 تعليق