تأمين الطاقة هدفي رئيسي في الوقت الحالي للحكومة المصرية. ومصر لاقت الحل ده في الطاقة النووية.. ياتري مصر هتعمل اية في مشروعات الطاقة النووية.. وازاي هتامن المفاعلات النووية واية الفايدة اللي هترجع علي مصر منها.

من فترات بعيدة ومصر بتحاول تدخل عالم الطاقة النووية، والحلم ده بدأ من أيام الرئيس الراحل جمال عبدالناصر وتحديدا في 1956 لما تم توقيع اتفاق ثنائى مع روسيا بشأن التعاون فى شئون الطاقة الذرية وتطبيقاتها فى النواحى السلمية وده كانت بداية مصر لدخول عالم الطاقة النووية السلمي للاستفادة منها في توليد الكهرباء وعلاج الأمراض المختلفة خصوصا علاج الأورام السرطانية.

الحلم المصري لدخول عالم الطاقة النووية للاسف توقف اكثر من مرة بسبب عقبات سياسية واقتصادية، وفضلت الأمور علي وضعها ده عام 2015 لما 
الرئيس عبدالفتاح السيسي ووقع اتفاقية مع نظيره الروسي فلادمير بوتين لإقامة أول محطتين نووية لتوليد الكهرباء بأرض الضبعة كمرحلة أولى، واللي هتستوعب مفاعلات نووية هتوصل لـ8 محطات نووية وهتم علي 8 مراحل، المرحلة الأولى منهم بتستهدف إنشاء محطة تضم 4 مفاعلات نووية لتوليد الكهرباء بقدرة 1200 ميجاوات بإجمالى قدرات 4800 ميجا وات، وبتكلفة هتوصل لـ5 مليار دولار للمفاعل الواحد وبإجمالى 20 مليار دولار.

بعد توقيع الاتفاقية بين مصر وروسيان في اكثر من شركة قدمت عروض لبناء المفاعلات النووية ووقعت الاختيار علي شركة روس آتوم الروسية، واللي كانت مقدمة عرض ضمن 6 شركات تانية، ووقع الاختيار عليها بسبب تناسب عرضها مع مصالح مصر السياسية والفنية والاجتماعية و الاقتصادية.

طيب مصر هتستفاد اية من محطات الطاقة النووية؟.
مصر حاليا عندها استراتيجية بتستهدف التحول لمركز اقليمي لتبادل الطاقة، وفي الوقت الحالي مصر عندها اكثر من خط ربط كهربائي مع دول عربية وأوروبية أهم مشروع الربط الكهربائي المصري السعودي واللي هيكون بقدرة 3 الاف ميجاوات، ومشروع الربط الكهربائي مع قبرص واليونان والسودان وليبيا.

زي ما أحنا عارفين أن مصر في الفترة اللي فاتت كان عندها مشاكل في توفير الطاقة للاستهلاك المحلي، وكانت الكهرباء بتقطع عندها بالساعات ودي كانت عامل سلبي لمصر خصوصا أن مصر زي ما احنا عارفين بتستهدف توسيع وجذب مختلف رؤوس الأموال الأجنبية للدخول للسوق المصري واقامة المشروعات المختلفة وده بهدف تغطية الطلب المحلي وكمان التصدير للخارج، وفي حالة استمرار ازمة انقطاع التيار فده هيكون عامل اساسي في هروب نسبة كبيرة من المشروعات والاستثمارات.

مصر في الوقت الحالي بتستهدف انتاج 4800 ميجاوات من الكهرباء من محطات الطاقة النووية في الضبعة، ودي نسبة كبيرة من الطاقة هتدخل علي الشبكة الموحدة للكهرباء وهتساعد مصر علي الوفاء بالتزماتها الدولة لخطوط الربط وهتكون مصدر اضافي لمصر لتصدير الكهرباء، ده غير كمان أنها هتكون سبب اساسي في توقف استيراد الغاز الطبيعي من الخارج واللي مصر بتستورده علشان تشغل محطات توليد التيار.