كشف الإعلامي أحمد شوبير، عن كواليس مكالمته مع هاني أبو ريدة رئيس الاتحاد المصري لكرة القدم، بعد فوزه بالتزكية بعد غلق باب الترشح.

وقال شوبير في تصريحات عبر برنامجه الإذاعي صباح اليوم: “قلت له في مكالمة بالأمس إياك وتكرار أخطاء الماضي، يعني متجبش حد سمعته مش نضيفة، متجبش حد أفسد لعبة أو نشاط أو كان مشهور عنه إنه مش كويس”.

وتابع: “أو ناس بتوهم الناس إنهم المسؤولين عن الكرة، وإنهم مش موجودين في الاتحاد لكنهم يفعلون كل شيء، لو هذا الأمر تكرر مرة أخرى هنكون داخلين على كارثة لأنك بتستنسخ نفس النظام القديم ونفس الاسماء الملوثة، فانت مترجعهاش من تحت لـ تحت، لأن في ناس مش موجودة لكن من تحت لتحت خارب الدنيا، فلا لعودة هذه الاسماء، لأننا ما صدقنا إنهم ابتعدوا عن الكرة المصرية من فترة طويلة”.

وأضاف: “أنا بتكلم بمنتهى الوضوح، الناس إللي زي دول خلصوا، وهو قالي أمس إن الناس دي مش هيكون ليهم دور تاني”.

واستكمل: “اللجان كلها قوم ولجنة الحكام قوم آخر، وأنت من هذه الفترة وحتى توليك المسؤولية رسمي يوم 10 ديسمبر عليك أن تساند اللجنة الحالية، لو رأيت أنهم ناجحين تمام لو عايز تضم ليهم خبير أجنبي لا مانع، المهم تكون لجنة قوية محترمة عشان الناس تصدق وتحترم وتقدر، خلي بالك يا بشمهندس هاني إن الشغل بيظهر للناس، ممكن تستعين بناس تاريخها محترم وسمعتها، لكن إياك والاستعانة بالفاسدين، لان هذا معناه إن اتحاد الكرة هيخرب، وإنت جئت لكي تنقذ ما يُمكن إنقاذه”.

واستمر: “عليك أن تعمل لائحة للكرة المصرية، المشكلة عندنا إن كل واحد بيعمل لائحة بيكون عينه على الانتخابات القادمة وليس لمصلحة الكرة المصرية، الشغل يبقى بحساب لصالح كرة القدم المصرية”.