يا ترى إيه سر الضجة اللي حصلت على سيارة "إكسيد" الجديدة، واللي تم إطلاقها امبارح من وزارة الصناعة ورفعت شعار "صنع في مصر"، وهل العربية دي هي بداية الإنتاج ولا في قبلها، وإيه هي مميزاتها اللي تخليك تشتريها وأنت مطمن، هنقولك على كل التفاصيل في الفيديو ده فتابعنا للآخر.
في الساعات الأخيرة، الفريق مهندس كامل الوزير، نائب رئيس مجلس الوزراء للتنمية الصناعية، وزير الصناعة والنقل، شهد إطلاق سيارة إكسيد، اللي تم إنتاجها في مصر، وده كان من مقر مصنع الشركة المصرية الألمانية للسيارات "إجا" في 6 أكتوبر.
"وإجا" دي شركة ألمانية بس واخدة تصريح العمل في مصر بالشراكة مع الحكومة المصرية، وعملت خطوط إنتاج في المصنع بتاعها، وبتعمل خط التجميع الكامل الخاص بالسيارة إكسيد وخط التجميع الكامل للسيارة المرسيدس وخطوط الدهان وخط الاختبارات النهائية، وكل ده قبل التسليم.
والخطوة دي بتيجي ضمن خطة توطين صناعة السيارات في مصر، عشان كده قال كامل الوزير، إن إطلاق السيارة الجديدة بيجي في ضوء توجيهات من الرئيس عبدالفتاح السيسي بتحويل مصر إلى مركز صناعي إقليمي، وخاصة صناعة السيارات
وكمان، خطة التوطين بتمتد للتعاون مع المصانع المحلية لإنتاج السيارات، وده عشان نزود نسبة المكون المحلي المستخدم في صناعة السيارات المحلية سنة بعد التانية ونبطل نستورد من الخارج، ومش بس كده لأ ده كمان نوفر العملة الصعبة ونحول مصر لمركز إقليمي وعالمي لإنتاج وصناعة السيارات.
ونقدر نقول، إن السوق المصري حاليا بيشهد تنوع في السيارات المصنعة محليا، زي شركات نيسان وجنرال موتورز وكمان شركة النصر للسيارات اللي بيتعدى نسبة المكون المحلي فيها 50%، وده إنجاز جديد لأول مرة يحصل في التاريخ.
ولكن لو بصينا للهدف من تشغيل مصانع إنتاج السيارات دي في مصر، هنلاقي أهداف كتير، أولها تلبية الاحتياجات المحلية، والاستغناء عن فكرة الاستيراد، وكمان توفير كل الماركات في السوق المحلي.
تيجي بقى لمميزات العربية الجديدة، فنقدر نقول إنها صناعة فاخرة، والمصنع بينتج العلامتين التجاريتين مرسيدس بنز وإكسيد عشان الصناعة المحلية تقدر تلبي مختلف احتياجات ومتطلبات السوق المصري، وده بيؤكد إن مهارة العامل المصري وقدرته على العمل والإنتاج في مختلف الصناعات مافيش عليها جدال.
ومصنع إجا، هينتج 1200 سيارة مرسيدس و3000 سيارة إكسيد سنوياً، وهيوفر فرص عمل كتيرة للشباب، ومن المستهدف زيادة الأرقام بتاعته على السنة الجديدة 2025، وده هيكون من خلال الاستفادة من الاستراتيجية الوطنية لتنمية صناعة السيارات، بجانب زيادة المكون المحلي اللي بيشمل أجزاء الفرش والزجاج والمقاعد بجودة عالية، وكمان في نفس الوقت الشركة بتستهدف فتح أسواق جديدة لسياراتها وخاصة في المنطقة العربية.
وأخيرا، دلوقتي صناعة السيارات في مصر هدفها إلى الوصول لاقتصاديات الإنتاج الكمي والتأهيل لإقامة صناعة متكاملة للسيارات، وده هيساهم بشكل كبير في ضخ مزيد من الاستثمارات المحلية والأجنبية، وكمان دعم وتشجيع زيادة الطاقات الإنتاجية للمصانع بهدف توفير احتياجات السوق المحلي ومن ثم التصدير للخارج بجودة عالية وبأسعار منافسة.
0 تعليق