قوة الاقتصاد المصري في تنوعه وإنه مش بيعتمد على حاجة واحدة ودي سر مرونته يعني زي الطيارة اللي 100 محرك لو عطل واحد فيه غيره شغال وبيحمي الطيارة من السقوط.. ليه بنقول كده.. تعالو نشوف 

مصر قبل نصر أكتوبر كانت بتعتمد على النظام الاشتراكي في الاقتصاد واللي بيعتمد بشكل أساسي على القطاع العام وفكرة أن القطاع الخاص مستغل وبيدمر الدول وييحسر الثروة قي في فئة معينة ودا ثبت أنه مش حقيقي بالمرة وأنه فكر اقتصادي عقيم بدليل أن القطاع الخاص هو اللي وصل أوروبا وامريكا لكل الثراء والتقدم الاقتصادي والتكنولوجي اللي هي فيه دلوقتي.

ليه القطاع الخاص هو قاطرة التنمية لأي دولة وعمود الاقتصاد والانطلاق والمنافسة والتجارة والتصنيع .. شوف حضرتك لأن القطاع الخاص بيشتغل عشان يربح والربح بيعتمد على حاجات كتير منها الجودة والابتكار المستمر والتوسع في الأنشطة والاستعانة بادارات علمية وتخطيط للمستقبل والمنافسة وعشان كده دايما الاقتصاد اللي بيعتمد على القطاع الخاص بيتوسع ويتطور باستمرار على عكس اقتصاد القطاع العام واللي بيعتمد على الدعم الحكومي وثبت بالتجربة أن شركات القطاع العام كانت بوابة كبيرة للفساد والاهمال والنتيجة المصانع اتحولت خردة واتوقفت خطوط الانتاج في أغلب شركات القطاع العام ودا لأن الترس اللي بيعمل محدش بيفكر يغيره ولما يقرر يغيره عشان خط الانتاج مايوقفش كله هيدخل في دايرة عقيمة من الروتين والأوراق والتوقيعات يكون المصنع غرق في الخساير.

عشان كل اللي قلناه دا مصر بجمهوريتها الجديدة رجعت تشجع القطاع الخاص المصري من تاني واللي اثبت انه قطاع قوي وقادر يغير المعادلة بدليل أنه فيه شركات كتير اتطورت وكبرت وبقت مطروحة كمان في بورصات عالمية وكمان بتنفيذ مشروعات في دول كتير وتخيل كده لو اقتصاد مصر قايم في الأساس على القطاع الخاص كان مصر زمانها فين..

المهم زي ما قلنا الحكومة قالتها صراحة الأيام الجاية هي ايام القطاع الخاص والحكومة وقعت شراكات اقتصادية بالفعل مع شركات القطاع الخاص هتقلب الموازين والمرة دي هيكون تمكين حقيقي للقطاع دا وهيتم إزالة كل القيود والروتين عشان ينطلق بجد في كل قطاعات الاقتصاد.

الجديد بقي كان البس أعلنه حسن الخطيب، وزير الاستثمار والتجارة الخارجية، لما قال إن مصر هتحتاج استثمارات من القطاع الخاص تصل إلى 240 مليار دولار لغاية سنة 2030 لتحقيق معدل النمو المستهدف بواقع 7%.

الخطيب، واللي شارك النهاردة في  مؤتمر الشراكة مع القطاع الخاص قال كمان أن وضع السياسات الواضحة طويلة الأجل هو التركيز الأساسى للحكومة حاليا لجذب المستثمرين الراغبين بالدخول إلى السوق المصرية وتعهد بدعم المستثمرين والمصنعين عشان نوصل في النهاية لاقتصاد قوي من كل ناحية.