زيادة الصادرات المصرية هدف استراتيجي للدولة المصرية، ومصر في الفترة اللي فاتت قدرت بشكل كبير أنها تكون باب دولاري مهم للاقتصاد المصري من التصدير الزراعي.. ياتري مصر بتعمل اية في النقطة دي.. ومصر حققت كام من الصادرات الزراعية.

شغل الحكومة كلها كلها اقتصاد في اقتصاد.. والخطة قايمة علي خطوات زيادة الصادرات المصرية في كل المجالات وتقليل الاستيراد وتوفير موارد دولارية لخزينة الدولة من التصدير.

خطة الحكومة لزيادة الصادرات الدولة المصرية بدأتها من زمان لما عملت بنية تحتية كبيرة لمصر في كل المجالات خصوصا مجالات الصناعة الزراعة، ومصر في الوقت الحالي بقت هدف استيراتيجي لكبري الشركات في العالم للدخول وانشاء وتشغيل مصانع وحاجات جديدة وتشغيل ايدي عاملة كتيرة في كل المشروعات، وده بعد الحوافز الكبيرة اللي قدمتها الحكومة لجذب رؤوس الاموال الأجنبية للدخول للسوق المصري.

قطاع الزراعة واحدة من القطاعات اللي الحكومة ركزت عليه بشكل خاص في السنين اللي فاتت، والدولة توسعت بشكل كبير جدا في القرعة الزراعية، ولسه بتتوسع تاني علشان تضيف أراضي زراعية جديدة لمصر، خصوصا أننا كلنا عارفين أن الرقعة الزراعية في الأراضي الطينية للاسف تقلصت بشكل كبير بسبب البناء المخالف عليها واللي انتشر بصورة بشعة جدا في الكام سنة اللي فاتوا وتحديدا في الفترة من 2011 ولحد 2013 .

طيب ازاي الحكومة قدرت تزود الرقعة الرزاعية في مصر؟.

مصر حاليا بتعد من اقل دول العالم واللي نصيب المواطن فيها من الرقعة الزراعية بيوصل لـ2 قيراط، فين أن حين أن المتوسط العالمي لنصيب الفرد من الرقعة الزراعية بيوصل لـ12 قيراط، وده نسبة قليلة جدا، علشان كده الحكومة في السنني اللي فاتت اتبنت روية لزيادة الرقعة الزيادة والخروج من المنطقة الضيقة في وادي النيل الضيق والدلتا، للتوسع في المناطق الصحراوية واللي بتوصل نسبتها لـ 96% من مساحة مصر الكلية.

الدولة المصرية في السنين اللي فاتت، اضافت اكثر من مشروع زراعي لرقعة مصر الزراعية أهمهم مشروع مستقبل مصر الزراعي واللي هيضيف 4.5 مليون فدان بنهاية 2027 والرقعة الزراعية اللي هتتضاف لمساحة مصر الزراعية هتوصل لمساحة 4 محافظات .

مصر حاليا بتستهدف زيادة الصادرات الزراعية بنهاية 2026 لـ6.3 مليون طن في 2026، وتحقيق 14 مليار دولار كصادرات زراعية في 2030، وده هيحصل من خلال فتح أسواق جديدة لزيادة صادرات الخضر والفاكهة، والتنسيق بين وزارات الزراعة والتجارة والصناعة والمالية لتذليل معوقات التصدير الزراعى، وتكثيف أعمال الأجهزة الفنية للحجر الزراعى فى الموانئ والمنافذ الحدودية لتسهيل أعمال تصدير الحاصلات الزراعية وفقا لاعلي المعايير العالمية.

الرئيس عبدالفتاح السيسي وجه الحكومة بتحقيق الاكتفاء الذاتى من الحاصلات الزراعية وتقليل الاعتماد على الواردات وتحسين مستويات الإنتاجية ورفع كفاءة استخدام الموارد الأرضية وتطبيق التقنيات الحديثة البديلة فى الزراعة والرى واستنباط سلالات جديدة ومتطورة علشان يكون عندنا منتج زراعي قادرة علي منافسة باقي المنتجات العالمية في الجودة والسعر .