هو إيه اللي بيحصل في سوق الدهب النهاردة؟ وازاي رجع يتراجع تاني بعد ما كل التوقعات بتقول إنه هيطلع للسما؟ طب إيه اللي خلاه يهبط كده فجأة في الساعات الأخيرة؟ وليه السوق اتقلب رأسًا على عقب بعد ما كنا متوقعين إنه هيكمل صعود؟

فى الساعات الأخيرة أسعار الذهب في السوق المصري خدت جولة هبوط محترمة.. الجرام عيار 21 اللي هو نجم السوق عندنا نزل حوالي 30جنيه في التعاملات اليومية ووصل لـ 4090 جنيه بعد ما كان لسه مستقر من كام يوم عند حدود على 4200 جنيه.. ومش بس كده الأوقية في البورصة العالمية كمان خسرت حوالي 23 دولار ودلوقتي بقت بـ 2893 دولار.

طب يعني إيه الكلام ده؟ إيه اللي قلب الموازين كده؟
أول حاجة لازم نفهمها إن الدهب مش بيطلع وينزل كده على هواه.. فيه عوامل كتيرة بتلعب في الموضوع.. والنهاردة الحكاية كلها بتدور حوالين حاجتين أساسيين الأولى هي عمليات جني الأرباح والتانية هي حالة القلق والشكوك اللي بتحصل في السوق العالمي بسبب تصريحات الرئيس الأمريكي دونالد ترامب عن التعريفات الجمركية.

وتعالى  أفصلك الموضوع على رواقة.. جني الأرباح معناه إن المستثمرين اللي اشتروا الدهب وهو رخيص لما شافوا السعر بيطلع وبقى عالي.. قالوا خلاص نكسب اللي كسبناه ونبيع دلوقتي.. البيع الكتير ده بيضغط على السعر ويخليه ينزل حتى لو الدولار نفسه ضعيف شوبة أو عائدات سندات الخزانة الأمريكية مش قوية زي الأول.. يعني السوق بيعدل نفسه وده تصحيح طبيعي بيحصل كل فترة.

لكن القصة ما وقفتش  هنا.. فيه حاجة تانية أكبر.. وهي تصريحات ترامب اللي زي الزلزال في السوق.. الراجل قال في أول اجتماع لمجلس الوزرا بعد تنصيبه إنه هيستمر في فرض تعريفات جمركية على دول كتير..و قال إن الرسوم على كندا والمكسيك هتبدأ من 2 أبريل.. وإن أوروبا هتاخد نصيبها برضو بنسبة 25% على السيارات وغيرها.. لكنه ما اداش تفاصيل كتير وده خلّى السوق في حالة ارتباك..و المستثمرين مش عارفين هيحصل إيه بالظبط، والشك ده بيأثر على كل حاجة، من الدولار للدهب.

واللي حصل إن الدهب كان فعلاً بيطلع الفترة اللي فاتت بسبب سياسات ترامب التجارية.. يعني لما بيهدد بفرض رسوم على الصين وكندا والمكسيك.. الناس بتبدأ تخاف من حرب تجارية كبيرة.. والخوف ده بيخليهم يجريوا على الدهب كملاذ آمن.. لكن النهاردة لما الناس شافت إن التعريفات دي لسه مش واضحة.. وبعض المستثمرين بدأوا يبيعوا عشان يكسبوا قبل ما السوق يتغير.. الدهب خد الصدمة ونزل.

طب إيه اللي متوقع يحصل الفترة الجاية؟ 
لو ترامب نفذ خططه التعريفية دي بشكل جدي.. يبقى التضخم في أمريكا هيرتفع.. لأن السلع المستوردة هتبقى أغلى.. والتضخم ده بيخلي الناس تبص للأصول الآمنة زي الدهب أكتر.. يعني ممكن نشوف الدهب يرجع يطلع تاني.. لكن لو الوضع هدي شوية واتضح إن التعريفات دي مش هتكون قوية زي ما الناس خايفة يبقى الدهب ممكن يفضل في مرحلة تصحيح يعني ينزل شوية أو يستقر.