هو ايه اللي بيحصل في سوق السيارات دلوقتي وليه الأسعار رجعت تنزل وليه الشركات بتقدم عروض دلوقتي للمشترين وامتي هتحصل الانفراجة الكبيرة في السوق..

 
معروف إن سوق السيارات في مصر بيعيش من فترة طويلة حالة من الترقب والتغيرات المستمرة مع تأرجح الأسعار بين الارتفاع والانخفاض ودا بيطرح تساؤلات حولين الأسباب ورا حالة الاضطراب في الفترة الأخيرة خاصة إنه في الأيام الأخيرة تراجعت أسعار بعض ماركات السيارات وفيه اكتر من شركة أعلنت عن تخفيضات كبيرة ودا كان لغز بردوا.. لكن تعالو نعرف إيه اللي بيحصل في السوق..

أهل السوق شايفين أن اتجاه بعض الشركات لتخفيض أسعار السيارات سببه زيادة المنافسة بين الشركات وتراجع الطلب في نفس الوقت ودا معناه أن الشركات اتنازلت عن جزء من الأوفر برايس وقررت تخفض الأسعار عشان تصرف للسيارات اللي عندها ودا بسبب حالة الركود الشديدة في السوق للفترة الأخيرة مع الارتفاع الكبير في الأسعار وأحجام المواطنين عن الشراء وانتظارهم لدخول الشركات الجديدة اللي بدأت تصنع في مصر على أمل انخفاض الاسعار وكمان إنتظار زيادة المعروض من السيارات الكهربائية في السوق المصري ودا دفع الشركات لمحاولة جذب المشترين عن طريق التخفيضات الأخيرة لإنعاش حركة البيع.

وعلى سبيل المثال أعلنت شركة جي بي كورب تخفيض أسعار سيارات هافال موديلات 2025 و2024، بقيم تراوحت بين 50 إلى 60 ألف جنيه وكمان خفضت الشركة أسعار سيارات شانجان موديلات 2025  بين 35 و100 ألف جنيه حتى نهاية مارس الحالي ووأعلنت شركة تويوتا إيجيبت تخفيض أسعار سيارات تويوتا كورولا بقيمة 100 ألف جنيه وخفضت الشركة المصرية الأوروبية للسيارات أسعار طرازين من سيارات سيتروين C5 موديلات 2025، بقيمة 240 ألف جنيه بمناسبة شهر رمضان.

منتصر زيتون، عضو شعبة السيارات في الاتحاد العام للغرف التجارية اتفق مع الرأي اللي بيقول إن المركبات الصينية هتحافظ على صدارتها في سوق السيارات في 2025 مدعومة بالتجميع المحلي اللي بيقلل التكلفة النهائية لسعر المنتج وقال كمان إن فيه سبب تاني على إقبال المصريين على السيارات الصيني وهو إن تكلفة تحويل سعر عملة الصين إلى الدولار أو اليورو أقل ودا بيدعم مبيعات السيارات الصينية وتوقع زيادة حصتها السوقية بنسبة 10% بسبب تفوق الصين عالميا في صناعة السيارات الكهربائية مقابل أي دول تانية وقال إنه بمجرد دخول السيارات الكهربائية إلى السوق المصرية هتشهد طلب مرتفع مقابل السيارات الأوروبية، خاصة مع زيادة عمليات التجميع المحلي للماركات الصينية ودا سبب رئيسي جديد دفع شركات السيارات الأوربية لطرح تخفيضات كبيرة في الأيام اللي فاتت.

طيب سوق السيارات رايح على فين ؟

واضح كده أنه هتكون فيه انفراجة كبيرة وقريبة ودا لعدة أسباب أولها  توافر العملة الأجنبية واللي هتسهل عمليات الاستيراد وزيادة المعروض في السوق وبالتاغ انخفاض الأسعار وتاني سبب هو زيادة المعروض من السيارات بعد فترة من النقص الحاد في المعروض ودا بعد زيادة إنتاج شركات السيارات وتوريدها للسوق المصري ودا بيزود المنافسة بين الشركات وهيخفض الأسعار وفي نفس الوقت تراجع الطلب الحاد هيدفع الشركات دي لإعادة النظر في أسعارها الحالية وهنشوف مزيد من التخفيضات في الفترة الجاية.