إيه اللي بيحصل في سوق الدهب، وليه الأسعار نزلت نزول تاريخي بالشكل ده سواء في مصر أو العالم كله، وهل ده مؤشر إن أسعار المعدن الأصفر. هيشهد نزول تدريجي خلال الفترة الجاية.. هنقولك كل التفاصيل في الفيديو ده فتابعنا للآخر.

مؤسسة "جولد بيليون"، المتخصصة في أسعار الدهب، قالت إن أسعار الدهب العالمية شهدت تراجع في تداولات الأسبوع، وده معناه إن الدهب فعليا سجل أسوأ أداء أسبوعي من أكثر من 3 سنين.

ونرجع نقول إن السبب في تراجع أسعار الدهب هو قوة الدولار الأمريكي، لأن العلاقة بينهم عكسية لو واحد ارتفع التاني ينزل على طول، وده حصل بعد تماسك معدلات التضخم الأمريكية ووجود حالة من عدم اليقين المصاحب لتوقعات السياسة النقدية.

عشان كده، انحدرت تداولات أونصة الذهب العالمي، لمستوى 2565 دولار للأونصة وسجل أعلى مستوى عند 2571 دولارا للأونصة وأدنى مستوى عند 2554 دولار للأونصة، وفي المقابل واصل الدولار الأمريكي تألقه مقابل سلة من العملات الرئيسية عشان يسجل أعلى مستوى السنة دي خاصة بعد ما لاقى دعم كبير من لحظة فوز دونالد ترامب بانتخابات الرئاسة الأمريكية.

ونقدر نقول، إن ضعف الدهب دلوقتي بيعكس التوقعات الحالية، بأن السياسة النقدية الأمريكية هتكون أكتر تعقيداً خلال السنة الجاية بسبب الإدارة الأمريكية الجديدة برئاسة ترامب واللي هتعتمد على سياسات مالية وضريبية هتدفع معدلات التضخم إلى الارتفاع وبالتالي هتستمر حالة خفض أسعار الفايدة.
لكن النزول في أسعار الدهب مش دليل على أن السوق بقي خلاص استقر والاسعار هتفضل تنزل كده لان فيه أسباب تانية كتير بتأثر وتحدد مصير المعدن الأصفر غير الحاجات اللي قلناها زي مثلا الصراعات والتوترات السياسية في العالم والوضع في خطوط الملاحة الدولية وسياسة البنوك المركزية العالمية بالنسبة لشراء الدهب واللي بتعتبره ملاذ آمن في الأزمات.

ولما نيجي نقيس الكلام ده على الأسواق الدولية وخاصة السوق المصري، فالمصريين دلوقتي بيشتروا دهب بعد ما أسعاره انخفضت بشكل كبير، وده لأنه خيار ذكي ومضمون للحفاظ على قيمة الفلوس، وبيعتبر كمان ملاذ آمن للادخار والاستثمار.

وأسعار الدهب في السوق المحلية بتتحدد على أساس 3 عوامل، الأول تداول الأوقية في البورصة العالمية، والتاني سعر صرف الدولار، والتالت العرض والطلب، وبناء على كده، سجل سعر جرام الدهب عيار 21 بدون مصنعية، 3548 جنيه للشراء و3528 جنيه للبيع، بعدما اتراجع على مرتين.

ولو حضرتك ناوي تنزل تشتري، فاتأكد من الصايغ ومصداقيته، ولازم تعرف اسم الشركة المصنعة، وبيانات القطعة، وسعر الدهب قبل الشراء، وكمان العيار والجرامات والدمغات، وماتنساش تفحص الدهب كويس قبل ما تشتري وتتأكد إن مافيهوش خدوش أو تشققات أو أي أخطاء.

وأخيرا، هنقولك الوقت المثالي لشراء الدهب، واللي هو إن حضرتك تبعد  عن مواسم حف الأفراح والخطوبات، وكمان تقتنص فترات الركود وتراجع الأسعار زي دلوقتي، عشان تقدر تحقق عوايد وربح مادي أكثر بعد فترة.