هل ممكن يوم 10 مارس يبقا نقطة انطلاق جديدة للاقتصاد المصري؟ وإيه اللي ممكن يحصل بعد ما صندوق النقد الدولي يوافق على المراجعة الرابعة لبرنامج الإصلاح الاقتصادي؟ وهل الـ1.2 مليار دولار اللي جايين في الطريق هيخلّصوا مصر من أزمتها الاقتصادية ؟ والسؤال الأهم بعد المراجعة دي قدّامنا كام خطوة لسه عشان نكمّل رحلة قرض الـ8 مليار دولار؟ 
 

يوم 10 مارس 2025.. يعنى بعد حوالي أسبوع بالظبط من دلوقتي.. صندوق النقد الدولي هيعقد اجتماع المجلس التنفيذي .. واللى هيتم فيه  مناقشة الموافقة النهائية على المراجعة الرابعة لبرنامج الإصلاح الاقتصادي اللي مصر بتنفذه  من 2022.. المراجعة دي مش مجرد ورقة هتتوقّع.. دي خطوة كبيرة ممكن تفتح الباب لصرف شريحة جديدة من القرض بقيمة 1.2 مليار دولار.

بس السؤال إيه اللي هيحصل بعد الاجتماع ده؟ وهل الخطوة دي هتكون بداية الفرج ولا مجرد خطوة على الطريق الطويل؟ 

أول حاجة لازم نفهمها.. لو المجلس التنفيذي لصندوق النقد قال 'تمام' يوم 10 مارس، هيحصل كام حاجة مهمة.. أولاً الـ1.2 مليار دولار هيتحولوا على طول لحسابات البنك المركزي المصري.. الفلوس دي جزء من القرض اللي اتفقنا عليه مع الصندوق سنة 2022 وتم تعديله وزيادته في مارس 2024 .. الفلوس دي هتدعم الاحتياطي النقدي وممكن تساعد في استقرار سعر الصرف شوية.. لأن الجنيه المصري لسه بيعاني من ضغوط كبيرة قصاد الدولار.

تاني حاجة.. الإصلاحات اللي مصر ملتزمة بيها هتاخد دفعة جديدة .. يعني الحكومة هتكمل خطتها في تحرير سعر الصرف و تقليص دعم الوقود والكهرباء وتوسيع دور القطاع الخاص..و كل ده جزء من البرنامج اللي الصندوق بيشترطه عشان يضمن إن الاقتصاد يبقى 'مستدام'.. بس في نفس الوقت، فيه ناس كتير بتقول: 'طب والمواطن؟ مين هيدفع تمن الإصلاحات دي؟' ودي نقطة مهمة هنرجعلها بعد شوية.

تالت حاجة.. لو المراجعة اتقبلت ممكن نشوف دفعة إضافية من صندوق الصلابة والاستدامة بتاع الصندوق.. ودي بتتراوح بين مليار و1.3 مليار دولار.. الفلوس دي معمولة عشان تدعم الاقتصاد في مواجهة التحديات الخارجية زي الحروب في المنطقة وتراجع إيرادات قناة السويس بسبب أزمة البحر الأحمر.. يعني الاجتماع ده مش بس هيحدد مصير الشريحة الرابعة ده ممكن كمان يجيب فلوس زيادة.

طب كده هبلفى باقي كام مراجعة لسه؟

خلّينا نحسبها سوا.. قرض الـ8 مليار دولار ده مدته 46 شهر.. يعني بيمتد لحد منتصف 2026 تقريبًا.. البرنامج فيه 8 مراجعات كلية كل مراجعة بيتم بعدها صرف شريحة معينة .. لحد دلوقتي مصر خلّصت 3 مراجعات واستلمت حوالي 1.987 مليار دولار من أصل الـ8 مليار.. المراجعة الرابعة اللي جاية يوم 10 مارس لو اتقبلت هتبقى الشريحة الرابعة وهتخلّي المبلغ اللي استلمته مصر حوالي 3.2 مليار دولار.

يعني لسه قدامنا 4 مراجعات بعد دي.. المراجعة الخامسة متوقعة في منتصف مارس 2025 يعني بعد الرابعة على طول.. وهتجيب معاها 1.2 مليار دولار تاني.. وبعدين فيه مراجعتين في 2025 واحدة في سبتمبر بـ1.2 مليار والتانية في نص 2026.. وكده هتكمل الـ8 مليار. يعني لسه الطريق طويل، وكل خطوة فيه بتعتمد على إن مصر تلتزم بالبرنامج زي ما الصندوق عايز.